Aqtóbede «sálem» sózi 30 tilde jazylǵan alleıa ashyldy
AQTÓBE. KAZINFORM — Aqtóbede buryn jeke avtoturaqtar ornalasqan aýmaqtyń ornyna jańa demalys orny paıda boldy. Bókenbaı batyr kóshesiniń boıynda «Sálem» dep atalatyn alleıa ashyldy.
Onyń basty ereksheligi — jer shary pishinindegi jaryq ınstallıatsııasy. Onda «sálem» sózi álemniń 30 tilinde jazylǵan.
Buǵan deıin bul aýmaqta eski kólikter men túrli tehnıkalar saqtalǵan eki jekemenshik avtoturaq bolǵan. Jalpy aýmaǵy 7 671 sharshy metrdi quraıtyn eki jer ýchaskesi Aqtóbe qalasy ákimdiginiń qaýlysy negizinde memleket muqtajy úshin májbúrlep alynyp, qalanyń jer qoryna qaıtarylǵan.
Bıyl demeýshiniń qoldaýymen aýmaq tolyqtaı abattandyryldy. Buryn qaraýsyz qalǵan alańnyń ornyna jaıaý júrginshiler joly, oryndyqtar, qoqys jáshikteri men shaǵyn sáýlettik nysandar ornatylǵan zamanaýı alleıa salyndy. Sondaı-aq jaryqtandyrý júıesi júrgizilip, balalar oıyn alańy men sportpen shuǵyldanýǵa arnalǵan vorkaýt alańy jabdyqtaldy. Jaqyn mańdaǵy úılerdiń turǵyndarynyń ótinishi eskerilip, kólik qoıýǵa da oryn qarastyrylǵan.
Kógaldandyrý jumystaryna da kóńil bólindi. Aýmaqta sýarý júıesi tartylyp, 4 qarasha kúni «Taza Qazaqstan» aktsııasy aıasynda 60 túp aǵash otyrǵyzyldy. Olardyń qatarynda shyrsha, jóke, qaıyń, shaǵan jáne terek bar.
Turǵyndardyń aıtýynsha, buǵan deıin bul jer qoqysqa tolyp, balalardyń oınaýyna qolaısyz bolǵan.
— Buryn balalardyń oınaıtyn jeri joq edi. Bul alań bos jatty, qoqysqa tolyp turatyn. Endi balalar úshin osyndaı ádemi oryn jasaldy. Munda taza ári qaýipsiz, oıyn alańy da bar. Qazir aǵashtar otyrǵyzylyp jatyr. Ýaqyt óte kele naǵyz jasyl baqqa aınalatyn túri bar, — dedi qala turǵyny Muharram Baızaqov.
Alleıanyń ashylý saltanatynda Aqtóbe qalasynyń ákimi Azamat Beket bul jer telimderiniń qaladaǵy halyq tyǵyz ornalasqan aýmaqta, sondaı-aq Álııa Moldaǵulova atyndaǵy halyqaralyq áýejaıǵa aparatyn negizgi kóshelerdiń boıynda ornalasqanyn atap ótti.
— Osyǵan baılanysty bul aýmaqta turǵyndardyń demalýyna arnalǵan qoǵamdyq keńistik qalyptastyryp, qalanyń sáýlettik kelbetin jaqsartý týraly sheshim qabyldanǵan bolatyn. Bıyl demeýshi tartylyp, aýmaqty abattandyrý jumystary júrgizildi.
Qazirgi tańda munda turǵyndardyń serýendeýine arnalǵan jaıaý júrginshiler joly salynyp, brýschatka tóseldi. Oryndyqtar, qoqys jáshikteri men shaǵyn sáýlettik nysandar ornatyldy. Sondaı-aq saıabaq shamdary qoıylyp, buǵan deıin kóktem-kúz mezgilderinde batpaqqa aınalyp, qarańǵy bolyp turatyn aýmaq jaryqtandyryldy.
Budan bólek, sýarý júıesi tartylyp, kógaldandyrý jumystary isteldi. Balalar oıyn alańy men sportpen shuǵyldanýǵa arnalǵan vorkaýt alańy ornatyldy.
Qala boıynsha jer telimderin memleket menshigine qaıtarý jumystary jalǵasyp jatyr. Bıyldyń ózinde 125 jer ýchaskesi qaıtaryldy. Olardyń jalpy aýmaǵy 90 gektar. Bul — ártúrli maqsattaǵy jerler. Onyń ishinde bas josparǵa sáıkes kelmeıtin nemese ıgerilmegen ýchaskeler de bar. Bul baǵyttaǵy jumystar jalǵasyn tabady, — dedi qala ákimi Azamat Beket.
Osylaısha, buryn qaraýsyz qalǵan aýmaq turǵyndardyń demalysy men serýendeýine arnalǵan jańa qoǵamdyq keńistikke aınaldy. Al 30 tilde jazylǵan «Sálem» sózi bar jaryq ınstallıatsııasy alleıanyń erekshe nyshany bolmaq.
