Aqtóbede sal aýrýyna shaldyqqan balalar úshin ıppoterapııa ortalyǵy ashyldy
AQTÓBE. QazAqparat - Aqtóbede sal aýrýyna shaldyqqan balalarǵa arnalǵan jabyq manejdi ıppoterapııa ortalyǵy ashyldy, dep habarlaıdy QazAqparat tilshisi.
Aqtóbe oblysynda 2014 jyly Ulttyq at sporty túrleri boıynsha balalar jáne jasóspirimder sport mektebi ashyldy. Munda jabyq manej boldy. Al taıaýda týabitti sal aýrýyna shaldyqqan balalarǵa arnalǵan jańa ıppoterapııa ortalyǵy qoldanysqa berildi.
«Erekshe balalarmen jumystyń ózi erekshe. Munda Daýn sındromy, aýtızm men týabitti sal aýrýyna shaldyqqan balalar men jasóspirimder keledi. Alǵash kezde olardyń boıyn úreı bılep, keıbiri dirildep, keıin sheginshekteıdi. Biz demep, qoldaý bildirgen soń úırenip jatyr. Bir balanyń janynda úsh adam júredi. Birer kúnnen soń ózi atqa minip, jattyǵýlaryn jasaıdy. Qazaq atty baǵalaǵan, qadirlegen. Emdik qasıeti mol. Qan aınalymyn jaqsartady, bala boıyndaǵy úreıden arylady. Tipti, aıaqqa turyp ketedi», - dedi jattyqtyrýshy Lýara Birmanova.
Munda kelgen bala bir aıda, keıbiri bir aptada kúlip, sóıleı bastaıdy.
«Balanyń kúlgeni - bizdiń jetistigimiz. Men ózim sal aýrýyna shaldyqqan balalar men aýtızm dertine dýshar bolǵandardy qamqorlyǵyma aldym. Ýaqyt talǵamaımyn. Eger aldyn ala jazylsa, tańǵy saǵat 8:00-den keshki saǵat 20:00-ge deıin ıppodromda júremiz», - dedi Lýara Birmanova.
Aıta keteıik, Aqtóbe oblysynda qazir múmkindigi shekteýli 3 myń bala bar. Olar ıppoterapııany qoldana alady. Jańa ortalyqta barlyǵy 200 bala em qabyldaýda, olardyń qataryn 300-ge jetkizý kózdelgen. Kúnine 20-30 bala 30 mınýttan jattyǵý jasaıdy. Munda barlyǵy 13 adam eńbek etse, onyń bireýi psıholog, biri dáriger- reabılıtolog.
«Ippoterapııa ortalyǵyna qajet atty sport mektebinen beremiz. Munda olarǵa bar jaǵdaı jasalǵan. Kúnine 4-5 at balalardyń densaýlyǵyn nyqtaýǵa bólingen. Tek qala balalary emes, aýdandaǵy múmkindigi shekteýli búldirshinder de osynda em qabyldaıdy», - dedi at sporty mektebi dırektorynyń oqý isi jónindegi orynbasary Abat Aımaǵambetov.
Sondaı-aq Almaty, Nur-Sultan, Oral, Atyraý qalalary men oblystarynan kelgender bar. Reseıdiń Orynbor qalasynan arnaıy joldama alyp, em qabyldaǵandar ıppoterapııanyń tıimdiligin erekshe baǵalaýda.
«Qyzymdy ákelip júrmin. Jasy - 8-de. Tili kesh shyǵyp keledi. Birinshi kelgen kúni qyzymnyń boıynda úreı baıqaldy. Keıin úırenip, qýana ortalyqqa keletin boldy. Aptasyna eki ret kelip, 30 mınýt attyń ústinde jattyǵý jasaıdy. Biz jattyqtyrýshylar men qamqorshylarǵa alǵysymyzdy aıtamyz. Mundaı ortalyq biz sekildi ata-analarǵa úmit syılaıdy, al balalar aıaqqa turyp ketedi», - deıdi Raýshan Demesinov.
