Aqtóbede saq-ǵun túrki áleminiń halyqaralyq forýmy ótedi
Aqtóbe oblysynda «Nur Otan» partııasynyń kezekten tys HHVІ konferentsııasy ótti. Jıyn kezinde oblys ákiminiń orynbasary Marat Toǵjanov Aqtóbede atqarylyp jatqan isterge toqtaldy. Bıyl óńirde tarıhı forým ótedi. Qyrkúıek aıyna «Uly dala muragerleri» forýmy josparlanǵan. Elbasy Nursultan Nazarbaevtyń «Uly dalanyń jeti qyry» maqalasy aıasynda, «Rýhanı jańǵyrý» baǵdarlamasyn iske asyrý kezinde barlyǵy 200-ge jýyq shara uıymdastyrylady.
«2019 jyldyń eń basty jobasy - Aqtóbe qalasynda «Uly dala muragerleri» saq-ǵun túrki áleminiń halyqaralyq forýmyn ótkizý. Forým aıasynda «Uly dala shejiresi» eskertkish-keshenin ashylýy, «Uly dala jaýharlary» atty kórme, «Uly dala muragerleri» teatrlandyrylǵan qoıylymy bolady. Túrki halyqtarynyń «Uly dala eposy jáne mýzykalyq mádenıeti» halyqaralyq folklorlyq festıvali, «Túıin túıip, temirden tas qashaǵan» atty tas-temir músinderiniń halyqaralyq sımpozıýmy, «Uly dala sheberleriniń uly murasy» halyqaralyq etnofestıvali, «Aral-kaspıı aımaǵy - Evrazııa tarıhy men mádenıet aıasynda» halyqaralyq ǵylymı konferentsııasyn ótkizilýi josparlanǵan», - dedi oblys ákiminiń orynbasary Marat Toǵjanov.
Aıta keteıik, bıyl «Týǵan jerge taǵzym» aktsııasy aıasynda 532 joba iske asyrylady. «Aýyl qamqorshysy» áleýmettik jobasy da nazardan tys qalmaıdy. Metsenattardyń qoldaýymen Aqtóbe qalasynda Jalańtós Bahadúrge, Edige batyrǵa, Bókenbaı batyrǵa, Eset batyrǵa, Baýyrjan Momyshulyna arnalǵan eskertkishter ornatylady. «Dalamnyń dara jyrlary» jyrshylar antologııasyn, «Aqtóbe aıtyskerleri» monografııasyn shyǵarý jáne «Uly dala ulaǵaty» aımaqtyq folklorlyq ansamblder baıqaýyn uıymdastyrý mindeti tur.
