Aqtóbede sábıli bolýdy armandaǵan jas kelinshektiń ólimine qatysty sot otyrysy ótýde
AQTÓBE. QazAqparat – Aqtóbede jeke medıtsınalyq ortalyqtaǵy operatsııa kezinde jumǵan Gúldana Nurmaǵanbetovanyń isine qatysty sot otyrysy ótýde. Qylmystyq is bir jyldan astam ýaqyt boıy tergeldi, dep habarlaıdy QazAqparat tilshisi.
20 jastaǵy Gúldana Nurmaǵanbetova ótken jyldyń qazan aıynda Aqtóbe qalasyndaǵy «Álııa» medıtsınalyq ortalyǵynda kóz jumdy. Aıdos pen Gúldana Nurmaǵanbetovter bir jyl boıy sábı súıe almaǵan soń jeke emhanaǵa baryp, gınekolog dárigerge qaralǵan. Keshendi em júrgizýdi usynǵan dáriger Álııa Shargaraeva keıin jas kelinshekti akýsher-gınekolog Olga Lı-Ko-Shın-Feterge tapsyrady. Operatsııa jasaǵan da sol dáriger. Aldyn ala boljam boıynsha G.Nurmaǵanbetova anafılaktıkalyq shoktan kóz jumdy.
Keıin Qylmystyq kodekstiń 317-baby 3-bóligimen, ıaǵnı, medıtsına nemese farmatsevtıka jumyskeriniń kásiptik mindetterin tıisinshe oryndamaýy babymen is qozǵaldy, sot-medıtsınalyq saraptama taǵaıyndaldy . Búgin №2 Aqtóbe qalalyq sotynda is qaraldy.
«1998 jyly týǵan Gúldana Nurmaǵanbetova bir jyl boıy sábıli bola almaǵan. 2019 jyldyń 16 sáýiri kúni «Álııa» medtsınalyq ortalyǵyna bardy. Ony akýsher gınekolog Álııa Shangaraevanyń ózi qabyldap, bedeýlikten emdeýge jiberdi. Sol kezde endometrııa dıagnozy qoıyldy. Ári qaraı Olga Lı-Ko-Shın-Feterge em júrgizdi. Dári-dármek berip, emdeldi. Arada 4,5 aı ótken soń ǵana jábirlenýshi Gúldana Nurmaǵanbetova medıtsınalyq ortalyqqa qaıta bardy. Dáriger naýqastyń dárige allergııasy, juqpaly aýrýy bar-joǵyn tekserýi kerek edi. Sol kezde medıtsınalyq em júrgizilip, ota jasaldy. Naýqas ortalyqta kóz jumdy», - dedi prokýror sot otyrysy kezinde.
Onlaın ótken sot otyrysy kezinde sottalýshy Olga Lı-Ko-Shın-Feter óz kinásin moıyndamady.
«Áıelimiz ekeýmiz balaly bola almaǵan soń tolyq tekserýden ótýge keńes berdi. Jubaıym «Álııa» medıtsınalyq ortalyǵyn tańdady. Aldymen 2019 jyldyń 16 cáýiri kúni bardyq. Maǵan birden unamady. Aqysy qymbat boldy, basa nazar aýdamady. Keıin bizge Olga Lı-Ko-Shın-Feter em júrgizedi dep sheshim qabyldandy. Áıelim áleýmettik jeli arqyly habarlasyp turǵan eken. Men bul iske kóp aralaspadym. Sóıtip 2019 jyldyń qazan aıynda bardyq. 14 qazan kúni men janynda boldym. Dári qabyldaǵan soń aýyrsyndy, keıin Olga Lı-Ko-Shın-Feter kabınetine alyp ketti. Shynyn aıtqanda, olar jedel kómek bere almady», - dedi Aıdos Nurmaǵanbetov.
Sot otyrysy jalǵasyp jatyr.
