Aqtóbede sábıler eńbektep jarysty
Búgin merekege oraı Aqtóbe oblysynda birneshe is-shara ótti. Tuńǵysh Prezıdent atyndaǵy saıabaqta ótken eńbekteý jarysyna barlyǵy 50 ata-anadan ótinish túsirgen. Olardyń bári de aldyn-ala daıyndalap, balalarynyń jyldam qımyldaýy úshin túrli aıla-tásil qoldandy.
«Tuńǵyshymdy eńbekteý jarysyna ákeldim. Ibrahım 9 aılyq bolsa da óte shıraq. Basseınge barady. Mundaı is-shara óte qyzyqty ári qıyn. Balam alǵashqylardyń biri bolyp keldi», - dedi qala turǵyny Aıdana Álibekqyzy. І-orynǵa 100 myń teńge, ІІ-orynǵa 80 myń teńge, al ІІІ-orynǵa 50 myń teńge berildi.
Sonymen birge oblys ákimi Ońdasyn Orazalın Aqtóbe oblysynyń halqyn Balalardy qorǵaý kúnimen quttyqtady.
«Bul eń meıirimdi jáne eń jarqyn sezimderdi týdyratyn tamasha mereke. Balalar – bizdiń mańyzdy qundylyǵymyz. Memleket basshysy Qasym-Jomart Toqaevtyń bastamasymen 2022 jyl bizdiń elde balalar jyly bolyp jarııalanǵan bolatyn. Búkil jyl balalyq shaqty qoldaýǵa, jas urpaǵymyzdyń ulttyq qundylyqtar negizinde sapaly bilim men jaqsy tárbıe alýyna, sapaly medıtsınaǵa, ozyq tehnologııalarǵa qol jetkizýine, ózin-ózi damytýǵa jáne ózin-ózi júzege asyrýǵa barlyq múmkindikterge jaǵdaı jasaýǵa jáne odan ári damytýǵa arnalady»,- dedi Ońdasyn Orazalın quttyqtaý sózinde.
Búginde Aqtóbe oblysynda jasy 18-ge deıingi 256 myńǵa jýyq bala bar. Oblys ákimi balalardyń jan-jaqty damýyna jáne óz áleýetin tolyq ashýǵa múmkindik berý – birinshi kezektegi mindet ekenin atap ótti. Aıta keteıik, bıyl shaǵyn qalalarda, aýdan ortalyqtary men aýyldarda 11 jańa mektep pen 26 mektepke deıingi uıymdar ashylyp, 56 mektep jóndeledi. Al 73 mektepte 143 pándik kabınet jasaqtalady. Budan bólek, balalardy tasymaldaý úshin 32 jańa avtobýs satyp alynady.
«Memlekettiń nazary men qoldaýy, úlkenderdiń, ásirese ata-analardyń tárbıege jaýapkershilikpen qaraýy balalarymyzdyń aqyldy da sanaly, elimizdiń naǵyz patrıoty bolyp qalyptasýyna jol ashatynyna senimdimin»,- dedi Ońdasyn Orazalın.
Foto: gov.kz
