Aqtóbede sábıin uryp óltirgen áke sot aldynda jaýap berip jatyr
Aqtóbe oblystyq qylmystyq ister jónindegi mamandandyrylǵan aýdanaralyq sotynda Qylmystyq kodekstiń «Adam óltirý» baby boıynsha 41 jastaǵy sottalýshyǵa aıyptaý aktisi oqyldy. Іs materıalyna súıensek, úshemniń anasy ata-ana quqyǵynan aıyrylǵan soń ákesi olardy sot arqyly ózine alǵan. Sóıtip, sottalýshy balalaryn anasynyń úıine aparyp, sonda turady.
«Birge turǵanda Artýr Ahýnov pen onyń anasy arasynda urys bolady. Anasy balalaryn alyp, úıden ketýin talap etedi. 2022 jyldyń 1 jeltoqsany kúni Ahýnov óziniń balalaryn «Úmit» sábıler úıine aparady. Qyzmetkerler sol kezde balalardyń denesiniń ár jerinde urǵannan qalǵan iz bar ekenin kóredi. Áńgime kezinde bala ózin ákesi urǵanyn aıtqan. «Úmit» sábıler úıiniń qyzmetkerleri birden polıtsııaǵa habar beredi. №1 qalalyq polıtsııa bólimi Ákimshilik quqyqbuzýshylyq týraly kodekstiń 73-baby boıynsha is qozǵady. Alaıda, Ahýnov odan sabaq almady. Qalalyq bilim bólimi men №1 qalalyq polıtsııa bólimi óz mindetterin tolyq atqarmady, balany alyp ketýge asyqpady. Saldarynan Ahýnov asa aýyr qylmys jasady», - dedi memlekettik aıyptaýshy Ásel Ýtenova.
Prokýrordyń aıtýynsha, 2022 jyldyń 23 jeltoqsany kúni saǵat shashamen 21:00-de Ahýnov balasymen birge jaldamaly páterde bolǵan. Bala aýyryp, mazasyndanǵan. Sonymen birge, baýyrlarynyń janyna barǵysy keletinin aıtqan. Al, baýyrlary ol kezde ájesiniń janynda bolǵan. Ákesi ashýlanyp, tergeý kezinde anyqtalmaǵan zatpen balany urady.
«Aldymen basynan, keıin keýdesinen soqqy jasaıdy. Bala qulap qalyp, esinen tanady. Ol oqıǵa ornynda kóz jumady. 2022 jyly 24 jeltoqsan kúni saǵat 16:45-te ekskavatordy 20 myń teńgege jaldaıdy. Ol «qurylystan qalǵan qaldyqty kómemin» dep aıtqan. Sol kúni saǵat 23:00-de Ahýnov qylmysyn jasyrý úshin eki qabatty úıdiń janyna balanyń denesin kómip tastaıdy. Keıin anasyna baryp, balanyń joǵalǵanyn aıtqan», - dedi prokýror.
Sot-medıtsınalyq saraptama kezinde Danıl Ahýnovtyń bas-mı jaraqatynan mert bolǵany belgili boldy. Onyń basyna qan quıylǵan. Keýde tusynan alǵan soqqy da aýyr bolǵan.
Sot otyrysy kezinde kýágerlerden jaýap alyndy. Balalar úıiniń áleýmettik qyzmetkeri Janna Dastanovanyń aıtýynsha, 2022 jyldyń 16 qarashasynda Artýr Ahýnov qorǵanshylyq keńesiniń sheshimimen balalardy alyp ketýge barǵan. Qyzmetkerler úsh balany baǵý qıyn ekenin eskertip, tańerteń ákelip, keshke alyp ketýge bolatyn top baryn aıtty. Eki kún boıy balalardy tańerteń ákelip, keshke alyp ketken áke keıin baılanysty úzip tastaǵan. Kóp uzamaı balalardyń týǵan kúninde olardy shaqyryp alyp, denesindegi kógergen izderdi anyqtaıdy.
«Balalarda kógergen iz bolǵan soń qorǵanshylyq bólimine habarlastyq. Olar polıtsııaǵa habar berýdi surady. Men 102 telefonyna habarlastym. Saýalnama júrgizip, jasóspirimder jónindegi ınspektor balalardy qarady. Túsinikteme aldy. Ákimshilik hattama toltyrdy. Sot saraptama jasaý úshin olardy ákesimen birge alyp ketti», - dedi kýáger Janna Dastanova.
Aıta keteıik, balanyń joǵalǵany týraly habar túsken soń ǵana ákimshilik is sotqa túsip, Artýr Ahýnovty 15 táýlikke qamaý túrindegi jaza qoldanylǵan.
Eske salsaq, oqıǵa byltyr jeltoqsan aıynda boldy. Marqum Danıl Ahýnovtyń ákesi balasynyń joǵalyp ketkenin aıtyp, polıtsııaǵa habar berdi. Al, arada eki kún ótkende oblystyq PD baspasóz qyzmeti balanyń denesi tabylǵanyn, onda zorlyq belgileri bar ekenin habarlady.
Sot otyrysy jalǵasyp jatyr.
