Aqtóbede sábıin baýyryna basa almaǵan jas ana dárigerlerdiń jazalanýyn qalaıdy
AQTÓBE. QazAqparat -Aqtóbe qalasynyń turǵyny Meıramgúl Ótepbergenova 9 aı boıy kútken balasynan aıyrylyp qaldy. Jas ana dárigerlerden eshqandaı kómek bolmaǵanyn BAQ ókilderine aıtyp berdi, dep habarlaıdy QazAqparat tilshisi.
Meıramgúl Ótepbergenova eki balanyń anasy. Úshinshisine júkti bolǵan kezde túsik tastap, keıin taǵy da balaly bolýdy josparlady. Arada 9 aı ótkende jedel járdemmen perzenthanaǵa jetkizilip, baqylaýǵa alyndy. Keıin sý ketip, kútý kezeńi bastaldy.
Meıramgúl Ótepovanyń aıtýynsha, arada biraz ýaqyt ótkende bólingen sýdyń túsi ózgere bastaǵan.
«Dárigerdiń de kinási bar. Men shaǵym aıtyp, Aqtóbe oblystyq densaýlyq basqarmasynan jaýap kútip otyrmyn. Jas analardyń bosanýyna kómektesetin dárigerler nemquraılylyǵy úshin jazalanýy tıis. Sý ketken soń jas ana 24 saǵat boıy baqylaýda bolady eken. Osy ýaqyt aralyǵynda balam ishte tunshyǵyp, eki kúnnen soń júregi toqtap qaldy. Barlyǵy 27 saǵat ishinde úsh ret balanyń júregi tyńdaldy, kardıotokografııa jasaldy. Talap boıynsha árbir eki saǵat saıyn tekserýge alý kerek. Júkti bolǵan kezde shaǵym bolmady, balanyń damýynda aqaý tirkelmedi. Ýltradybystyq zertteýler de sátti shyqty»,- dedi Meıramgúl Ótepova.
Dárigerler jas anaǵa jıi sý ishkizip, mazasyzdanbaýyn suraǵan. Keıin Meıramgúl Ótepbergenova tórt saǵat tolǵatyp, qyzyn ómirge ákeldi. Biraq bala ádettegideı jylamady. Birden jansaqtaý bólimine jatqyzyldy.
«Balam durys tynys ala almady. Ókpesi tolyp qalǵan. Bári «24 saǵat kútý kerek» dep qabyldanǵan ortaq talaptyń kesiri dep bilemin. Men perzenthanadan ózim shyǵyp, jansaqtaý bóliminde jatqan balama bardym. Reanımotolog balamnyń qınalǵanyn, sýsyz kezde ınfektsııa túsken dep túsindirdi. Sábıim qınalǵanda úlken dáreti shyǵyp ketip, aýa jetpedi. Balamdy baýyryma basa almadym, aq sútimdi bere almadym. Dárigerler keshirim de suramady»,- dedi jas ana Meıramgúl Ótepbergenova.
Jas ana 15 sáýir kúni perzenthanaǵa túsip, 16 sáýir kúni bosandy. Perzenthana dárigerleri balanyń shetinep ketýine ne sebep bolǵanyn túsindirip berdi. Dárigerler bosaný kezinde arnaıy hattamaǵa júginetinin, kesir tiligin jasaý, ýaqytynyn buryn bosandyrý tek belgili bir ýaqytta aralyǵynda júzege asyrylatynyn jetkizdi.
«Biz 24 saǵat baqylap, qaraýǵa tıispiz. Sý ketken kezde tússiz boldy. Bul qalypty. KTG jasalyp, onyń da nátıjesi jaqsy boldy. Saǵat úshte jasyl sý aǵa bastaǵanyn jetkizdi. Jasyl sý bolmady, taǵy KTG jasaldy. Baqylaý áli qaraı jalǵasty. Kezekshilik almasyp, jas ana taǵy da shaǵymdandy. Sol kezde kezekshi dáriger qarap, tekserdi. Hattamaǵa sáıkes baqylaý ýaqyty bitti. Tańǵy saǵat 7-ge taman jasyl sý ketip, bosanýǵa daıyndaldy. Balanyń júregi tyńdaldy, bári jaqsy boldy. Qyz balany dúnıege ákeldi. Ol jylamady. Jansaqtaý bólimine jatqyzylyp, jasandy tynys alý apparatyna qosyldy. Júktiliktiń barlyq kezeńinde balada sozylmaly ottegi jetispeýshiligi bolǵan. Biz osyny anyqtadyq»,- dedi dáriger Qarǵaly qalalyq perzenthanasynyń bólim meńgerýshisi Darıǵa Ospaǵambetova.
