Aqtóbede sabaqty túsinbegen balaǵa kúsh qoldanǵan tárbıeshi jumystan qýyldy
AQTÓBE. QazAqparat - Aqtóbe oblysynyń ákimi Ońdasyn Orazalın mektep pen balabaqshalarda aldyn alý jumystaryn júrgizýdi tapsyrdy, dep habarlaıdy QazAqparat.
Áleýmettik jelide balabaqsha tárbıeshisiniń balalarǵa qarsy kúsh qoldanyp jatqany týraly vıdeo taraǵan bolatyn. Bul oqıǵa 2018 jyldyń qyrkúıek aıynda Badamsha aýylyndaǵy «Aıgólek» balabaqshasynda bolǵan. Oqıǵadan keıin tárbıeshi jumystan shyǵarylyp, balabaqsha meńgerýshisi tártiptik jazaǵa tartyldy.
«Sonymen birge, Aqtóbe oblysynyń ákimi Ońdasyn Orazalın polıtsııa departamentine atalmysh máseleni erekshe baqylaýda ustaýdy tapsyrdy. Al bilim basqarmasyna jáne aýdan ákimdikterine mundaı jaǵdaıdyń qaıtalanýyna jol bermeý úshin oblystyń barlyq mektep jáne mektepke deıingi mekemelerinde barlyq qajetti sharalardy qabyldaýǵa, tıisti aldyn alý jumystaryn júrgizýdi tapsyrdy» delingen oblys ákiminiń baspasóz qyzmeti taratqan habarlamada.
Aqtóbe oblystyq polıtsııa departamentiniń habarlaýynsha, bolǵan oqıǵanyń mán-jaıyn anyqtaý úshin QR Qylmystyq kodeksiniń 140-baby 2-bóligi boıynsha aldyn ala tergeý jumystary bastaldy.
