Aqtóbede ruqsatsyz jumys istegen veterınarlyq zerthana jabyldy
AQTÓBE. KAZINFORM — Aqtóbede tabıǵatty qorǵaý prokýrorlary birqatar veterınarııalyq zerthanalarda zań buzýshylyqtar baryn anyqtady. Bul týraly Aqtóbe oblysynyń prokýratýrasy málim etti.
Aqtóbe oblysynda tabıǵat qorǵaý prokýratýrasy sharalarymen anyqtalǵan zań buzýshylyqtar boıynsha veterınarııalyq zerthananyń qyzmeti toqtatyldy.
«Tekserý barysynda veterınarııalyq-sanıtarııalyq ereje talaptarynyń buzylǵany, úı-jaılardy jeldetý, sýmen jabdyqtaý, jylý júıeleri, saraptamanyń ártúrli túrlerin júrgizýge arnalǵan jeke úı-jaılardyń, soıylǵan janýarlardy qarap-tekserý jáne veterınarııalyq saraptamany esepke alý jýrnaldarynyń joqtyǵy anyqtaldy», — delingen habarlamada.
Keıbir zerthanalarda etti tekserýge arnalǵan qural-jabdyqtar men hımııalyq reagentter bolmaǵan. Sonymen qatar, Aqtóbede ruqsatsyz jumys istegen veterınarlyq zerthana anyqtaldy.
Prokýrorlyq qadaǵalaý sharalarynyń nátıjesinde 1 zerthananyń qyzmeti toqtatyldy, 4 zerthana 370 myń teńgege ákimshilik jaýapkershilikke tartyldy.
Bul baǵyttaǵy jumystar áli de jalǵasyp jatyr.
