Aqtóbede reıd kezinde báki ustap júrgen jasóspirimder anyqtaldy
AQTÓBE. KAZINFORM — «Jasóspirim» jedel aldyn alý sharasy kezinde 300-ge jýyq kámeletke tolmaǵan polıtsııa bólimderine jetkizildi. Arasynda báki ustap júrgenderi de bar.
Elimizde «Jasóspirim» jedel aldyn alý sharasy jalǵasyp jatyr. On kúnniń ishinde Aqtóbeniń polıtsııa bólimderine 294 kámeletke tolmaǵan jetkizildi. Bul derek boıynsha barlyǵy 313 ákimshilik hattama toltyryldy. Balalarynyń tárbıesimen aınalyspaǵan ata-anaǵa 34 hattama berildi.
— Kámelet jasqa tolmaǵan balalardy zańdy ókilsiz, ata-anasyz oıyn-saýyq mekemelerine kirgizgeni úshin 4 ákimshige hattama toltyryldy. Ol jerlerde 5 bala boldy. Reıd kezinde kóbine balalardyń túnde esh baqylaýsyz júrý deregi kóp tirkeldi. Ákimshilik quqyqbuzýshylyq týraly kodekstiń «Kámeletke tolmaǵandardyń zańdy ókilderiniń erip júrýinsiz túngi ýaqytta oıyn-saýyq mekemelerinde nemese turǵynjaıdan tys jerde bolýy» baby boıynsha 249 hattama toltyryldy, — dedi Aqtóbe oblystyq PD ıývenaldy polıtsııa bóliminiń aǵa ınspektory Botakóz Jalekeshova.
Onyń aıtýynsha, 8 dúken ıesine 21 jasqa deıingi azamattarǵa ishimdik satqany úshin hattama toltyryldy. Іs sotqa jiberildi. Dúken ıeleri alkogol ónimderin satý lıtsenzııasynan aıyrylyp, aıyppul tóleýi múmkin.
— Kóshede júrgen 7 bala «Aıala» beıimdeý ortalyǵyna jetkizildi. Olar zańdy ókilsiz, ata-anasyz túnde qalada júrgen. Barlyǵy 15 bala esepke alyndy. Sonymen birge balasyn qaraýsyz qaldyrǵan 7 ata-ana da tizimge ilikti. Olar ishimdik ishetin otbasy. Qazir jastar báki ustap júr. Mundaı 2 derek tirkeldi. Bul jerde de ata-analarǵa balalaryn qaramaǵany úshin hattama toltyryldy. Sonymen birge esirtki jarnamalary bary 22 saıt buǵattaldy, — dedi Botakóz Jalekeshova.
Almaty oblysynda oqýshy óz synyptasyn óltirdi degen kúdikke ilindi. Jelidegi málimetke sáıkes, qaıtys bolǵan jasóspirim 11-synypta oqyǵan.