Aqtóbede respýblıkalyq Paralımpıada oıyndary ótip jatyr

AQTÓBE. QazAqparat - Búgin respýblıkalyq Paralımpıada oıyndarynyń úshinshi kezeńi aıasynda otyryp oınaıtyn voleıboldan jarys ótti, dep habarlaıdy QazAqparat Aqtóbe oblysy ákimdigine silteme jasap.

Otyryp oınaıtyn voleıboldan erler komandasy oblystyq múmkindigi shekteýli jandar klýbynda 2015 jyldan bastap jattyǵady, kóptegen jetistikterge qol jetkizgen.

Paralımpıada oıyndary barysynda Qostanaı oblysy men Astana qalasynyń komandalary ózderiniń dene daıyndyǵy men jeńiske degen erik-jigerin kórsetti.

Búgin Aqtóbe oblysynyń ákimi Eraly Toǵjanov «Mańǵystaý» men «Aqtóbe» komandalary arasynda ótken tartysty kezdesýdi tamashalap, voleıbolshylarǵa qoldaý kórsetti.

«Men sizderdi qala kúnimen quttyqtaımyn. Sizder - adamnyń múmkindigi shynymen sheksiz ekendiginiń mysalysyzdar, ómirdi qalaı súıý kerek ekenin, ómirden bárin alýǵa bolatyndyǵyn bilesizder. Bizdiń jastar sizderge qarap, boı túzeýi tıis. Biz múmkindigi shekteýli jandar úshin sportty damytýǵa barlyq jaǵdaı jasaımyz», - dep atap ótti Eraly Toǵjanov.

Esterińizge sala keteıik, bıyl Paralımpıada oıyndary 10-30 mamyr aralyǵynda Almaty, Astana, Aqtóbe qalalarynda ótýde. Elimizdiń barlyq óńirlerinen tirek-qımyl apparaty zaqymdanǵan jáne kórý qabileti buzylǵan 1 000-nan astam parasportshy on dıstsıplına boıynsha jarysýda.

Aqtóbede ústel tennısi, júzý, dzıýdo jáne voleıbol sııaqty sporttyń tórt dıstsıplınasy boıynsha jarystyń úshinshi, qorytyndy kezeńi ótip jatyr.

Paralımpıadalyq oıyndardyń alǵashqy eki kezeńiniń qorytyndysyna sáıkes, Aqtóbe oblysynyń qorjynynda 17 altyn jáne 8 kúmis medal bar. Jeńil atletıkadan qorytyndy esepte Aqtóbe oblysynyń quramasy 20 komanda arasynda 1 orynǵa ıe boldy.

Paralımpıada oıyndarynyń jabylý rásimi 30 mamyrda jekpe-jek saraıynda ótedi.