Aqtóbede respýblıkalyq mańyzy bar joldarda qum men tuz sebý jumystary júrgizilip jatyr
AQTÓBE. QazAqparat – Aqtóbede qar jaýyp, júk kólikteriniń qozǵalysy qıyndady. Qazir respýblıkalyq mańyzy bar joldarda 19 tehnıka ınertti materıaldardy sebý jumystaryn júrgizip jatyr, dep habarlaıdy QazAqparat tilshisi.
Aqtóbe qalasy men aýdandardaǵy jolda kólikter júre almaı jatyr. Sebebi kóbi qysqy dońǵalaqqa aýystyrylmaǵan. Oblystyq TJD bastyǵynyń orynbasary Qaırat Qasymnyń aıtýynsha, barlyǵy 8 aýdandaǵy jaǵdaı osyndaı. Aldaǵy eki kúnde de jel kúsheıip, kóktaıǵaq bolady.
«Qar jaýyp, jol taıǵaq boldy. Al júk kólikteri Samara – Shymkent tasjolynda tómpeshikterden óte almaı jatyr. Qum jáne tuz sebý jumystary júrgizilip jatyr. Qazirgi kezde jolda 5-10 tehnıka turyp qalyp tur», - dedi Aqtóbe oblystyq TJD basqarma bastyǵynyń mindetin atqarýshy Nurbek Oralbaev.
«Qazaqavtojol» JShS-niń málimetine súıensek, respýblkalyq mańyzy bar joldarda 19 tehnıka qutqarý, tazartý, qum men tuz sebý jumystary júrgizilip jatyr. Kóbi Samara-Shymkent, Aqtóbe-Orsk tasjoly men Soltústik aınalma jolda. Aıta keteıik, óńirde jylytý beketteri daıyn. Oblys boıynsha 156 pýnkt bar.
