Aqtóbede respýblıkalyq aqyndar aıtysy ótti

AQTÓBE. QazAqparat -Aqtóbede Ábilqaıyr hannyń 325 jyldyǵy men Astananyń 20 jyldyǵyna arnalǵan respýblıkalyq aqyndar aıtysy ótti, dep habarlaıdy QazAqparat tilshisi.

Aıtysqa Qyzylorda, Qaraǵandy, Pavlodar, Jambyl, Almaty, Aqtóbe oblystarynan 18 aqyn qatysty. Sóz saıysynda aqyndar el birligi, ult tutastyǵy, táýelsizdik jyldaryndaǵy jetistikterimizdi jyrlady. Barlyǵy 7 saǵattan astam ýaqytqa sozylǵan aıtysqa QR Halyq ártisi Asanáli Áshimov, ánshi-kompozıtor Altynbek Qorazbaev, dástúrli ánshi Tataıana Býrmıstrova, aqyndar Serik Aqsuńqaruly men Serik Qalıev tórelik etti.

Nátıjesinde 12 aqyn yntalandyrý syılyǵyna ıe bolyp, aıtysker aqyndar Álıhan Jaqsylyq, Meıirbek Sultan men Iran-Ǵaıyp Kúzenbaev 500 myń teńgeniń syılyǵyn aldy. Ekinshi oryn, 1 mıllıon teńge Rınat Zaıytovqa buıyrdy. Al birinshi oryn men 1,5 mıllıon teńge aqshalaı syılyqty Bolatbek Orazbaev aldy. Al bas júlde, 2 mıllıon teńgeni aqtóbelik aqyn Ershat Qaıboldın ıelendi.
 

Aıta keteıik, aqyndar aıtysy kezinde Nartaı Tileýqul «Kórermen kózaıymy» bolyp, Asanáli Áshimov atyndaǵy shyǵarmashylyq qoldaý jáne nasıhattaý qorynyń arnaıy syılyǵyn qaraǵandylyq Dıdar Qamıev aldy.

«Aqtóbede meıram, tarıhı kezeń boldy. Halyq aldynda júrgen aqyndardyń árqaısysy bir-bir tulǵa. Aqyndardyń aıtqan sózi kórermen qulaǵynda qalady. Halyq, el úshin jaqsy sózder aıtyldy. «Ónerdiń jany qushtarlyq, jaýy ishtarlyq». Sol qushtarlyq halyqqa berildi, aıtyldy»,- dedi Asanáli Áshimov.

Aqyndar búgin el birligi, tatýlyq týraly jyrlap, ózara ázildesti.