Aqtóbede respýblıkalyq ádebı forým ótti
Ádebıet forýmyna Jazýshylar odaǵynyń tóraǵasy Ulyqbek Esdáýlet, aqyn Aqushtap Baqtygereeva qatysty. Sonymen qatar elimizge tanymal aqyn-jazýshylar jınalyp, aldymen Іztaı Mámbetovtiń týǵan jerine baryp, Alǵa qalasyndaǵy kóshede eskertkishin ashty. Munda aýyl mektebinde aqyn atyndaǵy kabınet ashyldy. Forým Aqtóbe qalasynda jalǵasyp, óńir basshysy aldaǵy josparlarymen bólisti.
«Osy ólkeden shyǵyp, búginde ortamyzda joq anyq-jazýshylarymyzdy eske alýdy jón kórdik. Saǵı Jıenbaev, Tobyq Jarmaǵambetovtiń 85 jyldyq mereıtoıyn osy forým aıasynda atap óttik. Bul bizdiń paryzymyz. Jergilikti atqarýshy organ retinde Elbasymyzdyń «Rýhanı jańǵyrý» baǵdarlamasy aıasynda kóp is atqarylyp jatyr. «Aqtóbe kitaphanasy» 50 tomdyǵy túgendeldi. Aldaǵy ýaqytta bul baǵyttaǵy jumys jalǵasady. Jastardy áli de qoldap, kómek berýimiz kerek. Aqtóbege drama teatr salý kerek ekenin bilemiz. Aldaǵy ýaqytta salynady. Sonymen qatar Qýandyq Shańǵytbaev atyndaǵy úzdik aýdarma, Úmbetbaı Ýaıdın atyndaǵy úzdik satıra, Tobyq Jarmaǵambetov atyndaǵy úzdik proza, Tahaýı Ahtanov atyndaǵy úzdik dramatýrgııa, Іztaı Mámbetov atyndaǵy balalarǵa arnalǵan úzdik shyǵarmalar, Saǵı Jıenbaev, Tólegen Aıbergenov atyndaǵy úzdik poezııa baıqaýy ótedi. Árqaısysynyń júlde qory - 1 mıllıon teńge», - dedi oblys ákimi Ońdasyn Orazalın.
Aqyn-jazýshylar sońǵy jyldary ákimdiktiń ádebıetke erekshe kóńil bólgenin atap ótti. «Ǵasyrlar aýysqanda, qoǵam aýysqanda keıbir asyl dúnıemiz umytylyp qalýdyń az-aq aldynda qaldy. Sol kezde qaıta jarq etip, máselen Іztaı Mámbetovke eskertkish bıýst qoıyldy. Búgin Tobyq pen Saǵı aǵamyzdyń aty ulyqtaldy», - dedi Ulyqbek Esdáýlet.
Aıta keteıik, forým Baıǵanın aýdanynda jalǵasady.
«Aqtóbede ádebı forýmnyń ótýi jańalyq boldy. Bul-ádebıetke durys betburys. Urpaq baılyq qýyp kete me, óz tilinde sóılemeı me, kitabyn oqymaı ma dep oılaǵanymyz ras. Qazir jastarymyz kitap oqymaǵannan úı bolyp bir-birin súıip tura almaıdy, týǵan jerdi súıý degen án-jyrdy oqymaǵandyqtan, basqa eldiń án-jyryna eliktegendikten sheteldi ańsaıdy. Biz muny jasyrmaımyz», - dedi Aqushtap Baqtygereeva.
