Aqtóbede respýblıkalyq tasjoldy kútip ustaıtyn tehnıka jetkiliksiz
AQTÓBE. KAZINFORM - Sybaılas jemqorlyqqa qarsy is-qımyl agenttigi oblystyq departamenti halyq jıi shaǵym aıtatyn Aqtóbe-Hromtaý tasjolyna monıtorıng júrgizdi. Qazir joldy kútip ustaýǵa qajetti tehnıka jetispeıdi, qolda barynyń kóbi tozyp tur.
Aqtóbe oblysy boıynsha respýblıkalyq tasjoldy kútip ustaý «QAJ Servıs» JShS-ine júktelgen. Bul mekeme 1800 shaqyrymnan asatyn respýblıkalyq joldy kútip ustaý úshin 97 tehnıka paıdalanyp otyr. Negizi 257 tehnıka kerek.
«Bizge áli de 162 tehnıka jetpeıdi. Bar tehnıkamen joldy ustap turmyz. Bizdiń mindetimiz qysy-jazy kútip ustaý. Barlyǵy 97 tehnıkanyń 55-i eski, isten shyǵýǵa shaq qalyp tur. Qysta júk kólikteriniń janar-jaǵarmaıy qatyp, joldy bógeıdi. Bireýi 1 mınýt toqtasa, 15 kólik turady. Qystaı tasjoldar 40 ret jabyldy. Boran, kóktaıǵaqta jabamyz. Keıbiri tyńdamaı shyǵyp ketip, joldy bitep tastaıdy», — dedi «QAJ Servıs» JShS AOF dırektory Rahat Sydyqov.
QR Sybaılas jemqorlyqqa qarsy is-qımyl agenttigi Aqtóbe oblysy boıynsha departamenti basshysynyń birinshi orynbasary Almat Myrzaǵalıevtiń aıtýynsha, aldymen jergilikti jerde eskertý berildi, keıin «QazAvtoJol» AQ basshylyǵy shaqyrylýy múmkin.
«Tehnıka az, aqsha ýaqtyly bólinbeıdi. Jóndeý jumystaryna da mardymsyz qarjy aýdarylyp otyr. „Aqtóbe-Qarabutaq-Ulǵaısyn“ baǵyty — problemalyq aımaq. Bul jolǵa ýaqtyly kútim jasalmaǵan eken. Qaladan shyqqan boıda jol sapasy nasharlady. Bul arqyly qazirgi jaǵdaıyn anyq bilýge bolady. Bizdegi málimet boıynsha 2005-2006 jyldary munda jóndeý jumysy bolǵan, sodan beri jóndi jumys atqarylmaǵan. Kún saıyn 10 myń kólik júredi. Jazda 15 myńǵa deıin jetedi ári onyń 70% júk kóligi. „QazAvtoJol“ AQ 56 shaqyrymǵa konkýrs jarııalap, 3 jylǵa josparlady. Bul áli de az», — dedi QR Sybaılas jemqorlyqqa qarsy is-qımyl agenttigi Aqtóbe oblysy boıynsha departamenti basshysynyń birinshi orynbasary Almat Myrzaǵalıev.
Aıta keteıik, «Aqtóbe-Qarabutaq-Ulǵaısyn» tasjolyn salý úshin 7 ýchaskege bólindi. Bıyl 2 ýchaskede jóndeý júrgiziledi.
