Aqtóbede respýblıkalyq mańyzy bar joldarǵa ınertti materıaldar tasymaldanyp jatyr
AQTÓBE. KAZINFORM – Bıyl qysqa 33,8 myń tonna qum, 7,6 myń tonna tuz daıyndalady. Sonymen birge qar basý qaýpi joǵary jol bólikterine aǵashtan qalqan jasalady.
Aqtóbedegi respýblıkalyq jáne halyqaralyq baǵyttaǵy joldyń uzyndyǵy - 1876 shaqyrym. Qazirgi kezde osy joldyń 28 shaqyrymynda qaıta jańǵyrtý jumysy júrgizilip jatyr. Sondyqtan qysta bul aýmaqtaǵy joldy kútip ustaýǵa merdiger mekeme, ıaǵnı, «Sıne Mıdas Stroı» JShS jaýapty. Kompanııa borandy, kóktaıǵaq kúnderge dep 1000 tonna qum, 375 tonna tuz ázirleıdi. Sonymen birge taıǵaq jolǵa 8 belgi ornatylady. Qaýipsizdikti qamtamasyz etý úshin 6 tehnıka daıyndaldy. Al qalǵan 1848 shaqyrymdy kútip ustaý jumystaryn «QAJservıs» JShS-niń Aqtóbe oblystyq fılıaly atqarady. Fılıalda 6 jol paıdalaný bólimshesi, 12 jol paıdalaný pýnkti bar.
- Joldy qardan tazartý, toqtap qalǵan kólikti súıreý, qum sebý úshin 123 tehnıka ázirlendi. Talap boıynsha tehnıka sany 154 bolýy tıis. Qazirgi kezde 15-in jalǵa alýǵa kelisim bar. Taǵy 32-i jetispeıdi. Sonymen birge ınertti materıaldar da tasymaldanyp jatyr. Bıyl jospar boıynsha 33 800 tonnadan astam qum jınalady. Byltyrdan 12,5 myń tonnasy qalyp tur. Qalǵan 21 myń tonnadan astamy qazan-qarasha aılarynda arnaıy oryndarǵa úıiledi. Sonymen birge 7,6 myń tonna tuz qajet. Munda da byltyr 1,6 myń tonnasy qalǵan. Bıyl 1 myń tonnasyn jetkizýge kelisimshart jasaldy. Taǵy 5 myń tonnasyn jetkizý úshin konkýrs jarııalandy. Al 2 myń tonnasyn 2026 jyly alý jospandandy, - dedi «QazAvtoJol» UK» AQ Aqtóbe oblystyq fılıalynyń baspasóz qyzmeti.
Aqtóbe oblysyndaǵy respýblıkalyq baǵyttaǵy tasjolda 15 jylytý beketi bar. Barlyǵy 99 kereýet jabdyqtaldy.
- Respýblıkalyq mańyzy bar avtomobıl joldarynda qar basatyn 101 ýchaske bar. Bul degenimiz - 246 shaqyrym. Qazirgi kezde 86 shaqyrymynda temirbeton qorshaý ornatylǵan. Ózgesine aǵashtan qalqan ornatý jáne qar toqtatý jumystary júrgizý josparlanyp otyr. Aqtóbe oblysy úshin Samara-Shymkent avtojolynyń Aqtóbe-Hromtaý-Qarabutaq ýchaskesi eń ózekti bolyp tur. Jalpy uzyndyǵy 202 shaqyrymdyq joldy qysta kútip ustaý úshin 10 myń tonnaǵa jýyq qum, 2 myń tonna tuz daıyndalady. Kútip ustaý jumystary Aqjar, Hromtaý, Qarabutaq bólimshelerinde uıymdastyrylady. Kólik keptilisin aldyn alý maqsatynda Hromtaý, Qarabutaq aýyldarynda jalpy uzyndyǵy 34 shaqyrym ýaqytsha aınalma jol salý josparlanyp otyr, - dedi «QazAvtoJol» UK» AQ Aqtóbe oblystyq fılıalynyń baspasóz qyzmeti.
Hromtaý aýdany aýmaǵynda 23 shaqyrym, Áıteke bı aýdany aýmaǵynda 11 shaqyrym aınalma jol jasalady. 2024 jyldyń aqpan aıynda dál osy aýmaqta 2 myń kólik turyp qalyp, birneshe kún boıy qatynas toqtady. Bıyl qańtarda dál osy aýmaqqa aınalma jol salý jumysy júrgizildi. https://kaz.inform.kz/news/aktobede-kolk-keptels-bolatin-halikaralik-bagitta-aynalma-zhol-dayindalip-zhatir-beb2c4/