Aqtóbede respýblıkalyq mańyzy bar joldardy kútip ustaýǵa qajetti tehnıka jetkiliksiz
AQTÓBE. KAZINFORM — Qysta Aqtóbe oblysyndaǵy respýblıkalyq mańyzy bar joldardy «QAJservıs» kompanııasy men jóndeý jumystaryn júrgizip jatqan merdiger kútip ustaıdy. Jetkiliksiz tehnıkalardy jalǵa alýdy josparlap qoıǵan.
Aqtóbe oblysynda respýblıkalyq mańyzy bar avtomobıl joldarynyń uzyndyǵy 1869 shaqyrymdy quraıdy. Onyń 117 shaqyrymynda qaıta jańartý jumystary júrgizilip jatyr. Aqtóbe-Astrahan avtojoly bıyl qoldanysqa beriledi. Eger bul aýmaq qoldanysqa berilse, qysta kútip ustaýǵa qosymsha 17 tehnıka qajet bolady.
Al «Samara-Shymkent» tasjolynyń 791-819 km aralyǵyna qurylys júrgizip jatqan «Sıne Mıdas Stroı» JShS-i jaýapty. Kompanııa qysta úzdiksiz jáne qaýipsiz jol qozǵalysyn uıymdastyrý maqsatynda 10 arnaıy tehnıkany daıyndap qoıdy.
Al «QAJservıs» JShS Aqtóbe oblystyq fılıaly respýblıkalyq jáne halyqaralyq mańyzy bar avtomobıl joldary jelisiniń ázirge 1752 shaqyrymyn kútip ustaý jumystaryn atqarady. Munda 400-den astam jumysshy bar. Jolǵa barlyǵy 250-den astam tehnıka qajet bolsa, onyń qazir 104-i ǵana bar. Bıyl 18 tehnıkany jalǵa alǵanymen áli de 150-den astamy qajet.
— Jetispeıtin arnaıy tehnıkalar jalǵa alynady jáne ortalyqtan tehnıka jetkiziledi. Qajetti 257 tehnıkanyń 135-i, ıaǵnı, 50%-y bar. Qysqy merzimge 33 myń tonnadan astam qum, 7 myń tonnadan astam tuz daıyndalady. Sonymen birge jol boıynda ornalasqan 15 jylytý pýnktinde 51 kereýet jabdyqtaldy, — dep habarlady «QAJservıs» JShS Aqtóbe oblystyq fılıaly.
Qazirgi kezde respýblıkalyq mańyzy bar avtomobıl joldarynyń 246 shaqyrymynda 100-den astam ýchaske qaýipti aımaq tizimine endi. ıAǵnı, bul jerlerde qar basý qaýpi joǵary. Bul ýchaskelerdiń 86 shaqyrymynda temirbeton qorshaý ornatylǵan. Qalǵan ýchaskelerinde aǵashtan jasalǵan qalqandardy ornatý jáne qar toqtatý jumystary júrgiziledi.
— Asa qaýipti ýchaskelerde, ıaǵnı, Bershúgir taýynda, Qalybaı jáne Aqjar aýyldarynda, Aqtóbe-Orsk jolynyń 60 shaqyrymyndaǵy qyrda býldozer bekitilgen. Sonymen birge sońǵy jyldary kezikken qıyndyqtarǵa baılanysty ınertti materıaldar saqtaý orny kóbeıdi. Barlyǵy 11 orynǵa qur men tuz jetkiziledi, jylytý pýnktteri de sol jerlerde bolady. Úzdiksiz jáne qaýipsiz qozǵalysty qamtamasyz etý úshin dıspetcherler táýlik boıy jumys isteıdi. Demalys, mereke kúnderi kezekshilik uıymdastyrylady, — dep habarlady «QAJservıs» JShS Aqtóbe oblystyq fılıaly.
Eske salsaq, qazirgi kezde tótenshe jaǵdaılar qyzmeti men azamattyq qurylymnan 1 567 adam men 455 tehnıka ázir. Respýblıkalyq jáne oblystyq mańyzy bar joldarda 129 jylytý beketi bolady.
