Aqtóbede reseılik satyp alýshylardyń kóbeıýi bizge tıimdi — Jumanǵarın

ASTANA. KAZINFORM — Premer-mınıstrdiń orynbasary — ulttyq ekonomıka mınıstri Serik Jumanǵarın Aqtóbede reseılik satyp alýshylardyń kóbeıýi týraly pikir bildirdi. 

Sońǵy kúnderi Aqtóbede Reseıdiń shekaralas óńirlerinen keletin satyp alýshylar sany artyp otyr.

Mınıstr oǵan rýbldiń tıimdi baǵamy (1 rýbl — 6,7 teńge) yqpal etip otyrǵanyn aıtty.

— Shynyn aıtsam, búgin baspasóz konferentsııasyna deıin Saýda mınıstrligine taldaý júrgizýdi tapsyrdym. Ázirge ondaı jappaı úrdis baıqalmaıdy. Árıne, tehnıka, qymbat segmenttegi taýarlardy alyp jatqandar bar. Biraq qazir Qazaqstanda tutyný sektorynyń jaqsy deńgeıde qamtamasyz etilgen, sondyqtan Reseıdiń shekaralas óńirleri úshin bul da jaqsy bir jol dep oılaımyn. Nátıjesinde biz tabys tabamyz, taýar ótkiziledi, ázirge eshqandaı másele kórip otyrǵan joqpyn, — dedi Serik Jumanǵarın Úkimette ótken baspasóz máslıhatynda.

Buǵan deıin Serik Jumanǵarın elimizde eń tómengi jalaqy mólsheri kóterilmeıtinin aıtqan edi.