Aqtóbede reseılikter bes kompanııany zańsyz ashyp alǵan

AQTÓBE. QazAqparat – Aqtóbe prokýratýrasy kóleńkeli ekonomıkany kásip etken kompanııalardy anyqtady, dep habarlaıdy QazAqparat tilshisi.

2018 jyly oblysta Qylmystyq Kodekstiń «Jumysty is júzinde oryndaýsyz, quqyqtyq qyzmet kórsetýlersiz, taýarlardy jóneltýsiz shot faktýra jazý áreketterin jasaý» baby boıynsha 10 is qozǵalǵan bolatyn. Bıyl jyl basynan beri 2 qylmystyq is tirkelip otyr. Al salyqtan jaltarǵan 4 is bar.

«Óńirde «bir kúndik fırmalardy» jalǵan tulǵalardyń atyna tirkeý tájirıbesi jalǵasýda. Mysalǵa Reseı Federatsııasynyń eki azamaty Kóshi-qon zańnamasyn buzyp, bıznes–ımmıgrant vızasyn almaı, 5 kompanııany zańsyz tirkegen jáne sol arqyly 1,5 mlrd teńge aqshany qolma-qol aýdaryp alǵan. Bul derek boıynsha oblys prokýratýrasy Qylmystyq kodekstiń 216-baby boıynsha sotqa deıingi tergep-tekserýdi bastady», - dep habarlady oblystyq prokýratýranyń baspasóz qyzmeti.

Aıta keteıik, oblys prokýratýrasynyń bastamasymen Ekonomıkalyq tergep-tekserý departamentine 10 kompanııanyń basshysyna qatysty sotqa deıingi tergep-tekserý bastaldy. Qazirgi kezde kelisimsharttardy jaramsyz dep taný týraly 35 talap aryz sotqa berilip, qanaǵattandyryldy. Memlekettik kirister departamentine tapsyrma berilip, salyqtyq tekserýler júrgizildi. Nátıjeleri «bir kúndik fırmalarǵa» 6,1 mlrd teńge qosymsha salyq esepteldi.