Aqtóbede reseılik kólikterdi urlap satqan top ustaldy
AQTÓBE. QazAqparat – Aqtóbede «VAZ-2114», «VAZ-2115» kólikterin urlap, ony Oral qalasynda satqan top anyqtaldy, dep habarlaıdy QazAqparat tilshisi.
Aqtóbe qalasy boıynsha bir mezette 10-nan astam reseılik markaly kólik urlandy. Osy jyldyń qyrkúıek-qazan aılarynda kólik ıeleri polıtsııaǵa jıi shaǵym túsirgen.
«Jedel izdestirý kezinde urlanǵan kóliktiń biri Oral qalasynan tabyldy. Keıin odan kólik satyp alyp júrgen Oral qalasynyń turǵyny ustaldy. Іzinshe Aqtóbe qalasynda urlanǵan kólikti satyp alyp, ony jóneltken adam da anyqtaldy. Urlyq jasap júrgender men kólikterdi tabý qıynǵa soqty. Sebebi, qujattar kólik ishinde qalyp, qaıta-qaıta satylǵan. Eki adam kólikti aıdap ketip, ekeýi satyp alýmen, satýmen aınalysqan. Bári de Qazaqstan azamaty», - dedi oblystyq PD baspasóz qyzmetiniń jetekshisi Erbolat Sarqulov.
Aıta keteıik, qazirgi ýaqytta urlanǵan 6 kólik tabyldy. Tergeý jalǵasyp jatyr.
