Aqtóbede referendýmdy qoldaýǵa arnalǵan jastar festıvali ótti
AQTÓBE. KAZINFORM — Aqtóbede Bókenbaı batyr kóshesindegi jańadan ashylǵan «Anvar» gıpermarketi aldynda referendýmdy qoldaýǵa arnalǵan jastar festıvali uıymdastyryldy, dep habarlaıdy oblys ákimdiginiń baspasóz qyzmeti.
Ashyq aspan astynda ótken merekelik kesh qala turǵyndaryna saıası naýqandy aqparattyq-túsindirý formatynda jalǵasty.
Іs-sharany qala jastary uıymdastyrǵan. Sahnada oqý oryndarynyń bilim alýshylary men óner ujymdary óner kórsetti. Jınalǵan qaýymǵa oblystyq koalıtsııa músheleri Jańa Konstıtýtsııa jobasynyń negizgi baǵyttaryn túsindirip, 15 naýryzda ótetin respýblıkalyq referendýmǵa belsendi qatysýǵa shaqyrdy.
Oblystyq máslıhat depýtaty Aıgúl Nurkeeva referendýmdy tarıhı kezeń dep atap ótti. Onyń aıtýynsha, Konstıtýtsııa — memlekettiń tiregi ári bolashaq urpaqtyń taǵdyryna áser etetin basty qujat.
— Biz búgin tarıhı kezeńniń kýási bolyp turmyz. Konstıtýtsııa — memleketimizdiń tiregi, bolashaq urpaqtyń taǵdyryna tikeleı áser etetin basty qujat. Qabyldanatyn ózgerister ádiletti, progressıvti Qazaqstandy qalyptastyrýǵa baǵyttalǵan. Barshańyzdy referendýmǵa kelip, daýys berýge shaqyramyn. Bolashaǵymyz úshin birge sheshim qabyldaıyq! — dedi oblystyq máslıhat depýpaty Aıgúl Nurkeeva.
«Jastar rýhy» jastar qanaty oblystyq fılıalynyń tóraǵasy Álisher Tynyshtyq eldegi turaqtylyq pen reformalardyń nátıjesine toqtaldy.
— Bul ózgerister — Prezıdent Qasym-Jomart Toqaevtyń ádiletti qoǵam qurýǵa jáne jastardy qoldaýǵa baǵyttalǵan saıasatynyń nátıjesi. Jańa Konstıtýtsııa — jaı qujat emes, bilimge, ǵylymǵa jáne ınnovatsııaǵa ashylǵan keń jol. Bul — ár jasqa berilgen naqty múmkindik. Referendým — «Men elimmen birgemin!» dep aıtatyn sheshýshi sát. 15 naýryz — ár adam daýys berý arqyly el tarıhyn aıqyndaıtyn kún. Biz tańdaý jasaımyz jáne bolashaqty birge quramyz! — dedi ol.
Sondaı-aq, «Anvar» saýda jelisiniń dırektory Aslan Qaıyrǵalıev te óz pikirin bildirdi. Ol jańa jobada azamattardyń quqyqtary men bostandyqtary, eńbek quqyqtary konstıtýtsııalyq deńgeıde bekitiletinin alǵa tartty.
— Qalamyzda irgeli nysandardyń boı kóterýi Prezıdenttiń kásipkerlikti qoldaý saıasatynyń tikeleı jemisi dep aıta alamyn. Ár adamnyń quqyǵy men bostandyqtary memlekettiń basty basymdyǵy retinde bekitilip otyr. Ár adam sapaly eńbekpen, ózi qalaǵan kásip túrimen aınalysýǵa quqyly. Eldik múdde men jarqyn bolashaq úshin barsha aqtóbelikti jańa Konstıtýtsııany qoldaýǵa shaqyramyn! Elimiz aman, kásibimiz berekeli bolsyn! — dedi Aslan Qaıyrǵalıev.
Aıta keteıik, respýblıkalyq referendým 15 naýryzda ótedi.