Aqtóbede referendým ýchaskeleri daıyndyqty aıaqtady
AQTÓBE.KAZINFORM — Aqtóbe qalasyndaǵy № 116 referendým ýchaskesinde myńnan astam saılaýshy tirkelgen. Olardyń 7-i óz tańdaýyn úıde otyryp jasaıdy.
Aqtóbe oblysy boıynsha respýblıkalyq referendýmda 14 aýmaqtyq jáne 528 ýchaskelik referendým komıssııasy jumys isteıdi. Referendým komıssııalarynyń quramynda 3 534 múshe bar.
Kazinform tilshisi № 116 referendým ýchaskesindegi jumysty kórdi. Ýchaskelik referendým komıssııasynyń tóraǵasy Bıbigúl Jaskelenovanyń aıtýynsha, ázirlik aqpan aıynda bastalyp, tolyq aıaqtaldy.
— Komıssııa músheleri shaqyrý qaǵazdaryn túgel taratyp shyqty. Qazirgi kezde referendým ýchaskesi referendýmǵa tolyq daıyn. Ýchaskede 1478 saılaýshy bar. Onyń 7-i úıden daýys berýge ótinish qaldyrdy. Ótinish 15-naýryz saǵat 12:00–ge deıin qabyldanady. Sonymen birge esepten shyǵarý týraly kýálikti alyp jatqan turǵyndar da bar. Ýchaskedegi tizimde bar-joǵyn naqtylap jatqan adamdar da jeterlik. Qazaqstan turǵyndaryn bolashaǵymyz úshin tańdaý jasaýǵa shaqyramyz, — dedi № 116 referendým ýchaskesiniń tóraǵasy Bıbigúl Jaskelenova.
Munda eki jyljymaly jáshik bar. Baıqaýshylar men BAQ ókilderine arnalǵan oryn jasaqtalǵan. Múgedektigi bar adamdar óz tańdaýyn jasaǵan kezde arnaıy qurylǵylardy qoldana alady.
Aıta keteıik, 116 referendým ýchaskesinde tóraǵadan bólek 5 komıssııa múshesi bar. Bári de aldyn ala biliktiligin arttyrdy.
— Refendým kúni kontsert uıymdastyrylady. Sonymen birge qolóner sheberleriniń kórme-jármeńkesi ótedi. Tipti arnaıy fotoaımaq daıyndap qoıdyq. Bizdiń referendým ýchaskesinde 18-ge tolǵan 32 turǵyn bar. Sonymen birge sol kúni 6 adamnyń týǵan kúni bolady. Qarttarymyzǵa da arnaıy syılyq daıyndaldy, — dedi B. Jaskelenova.
Jalpy Aqtóbe oblysynda respýblıkalyq referendýmǵa qatysýǵa quqyǵy bar 577 053 adamnyń tizimi jasaldy.
Buǵan deıin habarlaǵanymyzdaı, referendým kúni daýys berýshiler tirkelgen mekenjaıy boıynsha ýchaskege barýy tıis. Bul jóninde QR Ortalyq saılaý komıssııasy málimdedi.