Aqtóbede referendým kúni sýrdoaýdarmashylar men ınvataksı qyzmeti uıymdastyrylady
AQTÓBE. KAZINFORM – Barlyǵy 18 sýdroaýdarmashy jáne 79 ınvataksı bolady. Sonymen birge múgedektigi bar adamdarǵa eriktiler men áleýmettik qyzmetkerler de kómek kórsetedi.
Aqtóbe oblysyndaǵy referendým ýchaskeleri óz jumysyn 23-aqpan kúni bastady. Al daýys berýshilerdiń tizimi 27-aqpan kúni naqtylandy. Sonyń ishinde múgedektigi bar adamdarǵa erekshe nazar aýdardy. Monıtorıng toby barlyq referendým ýchaskesin qarap, tekserip shyqty. Munda kez kelgen adam erkin kirýi tıis.
- Aqtóbedegi barlyq referendým ýchaskesi birinshi qabatta ornalasqan. Óńirdegi 514 ýchaskesiniń 464 -de pandýs bar. Al 50 ýchaskege pandýs qajet emes. Árqaısysynyń kireberisine shaqyrý batyrmasy ornatylǵan. Odan keıin taktıldi kórsetkishter arqyly baǵyt-baǵdar alady jáne ol týraly «Qoljetimdilik kartasy» portalyna engizilgen. Daýys berý ýchaskelerinde múgedektigi bar azamattarǵa arnalǵan buryshtar da qarastyrylǵan. Onda kompıýter, qulaqqap, úlkeıtkish áınek, Braıl trafareti, aýdıobıýlleten jáne Konstıtýtsııanyń aýdıojobasy bar. Daýys berý kúni 18 sýrdoaýdarmashy jáne 79 ınvataksı uıymdastyrylady. Múgedektigi bar azamattarǵa kómek berip, qoldaý kórsetý úshin eriktiler men áleýmettik qyzmetkerler jumys isteıdi, - dep habarlady Aqtóbe oblystyq aýmaqtyq referendým komıssııasy.
Aqtóbede 3 529 múgedektigi bar adam referendým kúni tańdaý jasaı alady. Onyń teń jartysynyń kórý qabileti buzylǵan. Al 35-i Braıl shrıftin paıdalanady.
Aıta keteıik, bıyl 17 myńǵa jýyq aqtóbelik alǵash ret tańdaý jasaıdy. Onyń 48-i sol kúni 18-ge tolady.
Buǵan deıin habarlaǵanymyzdaı, Batys Qazaqstan oblysynda 503 referendým komıssııasy bolsa, sonyń 14-i – aýmaqtyq komıssııa. Munda 98 adam, sonyń ishinde 46-sy turaqty negizde jumys isteıdi.
