Aqtóbede refendým ýchaskesi ashylǵanda daýys bergen adamdar syılyq aldy

AQTÓBE. KAZINFORM – Aqtóbedegi №1 orta mektepte ornalasqan №72 referendým ýchaskesi alǵashqy bop tańdaý jasaǵan adamdarǵa syı usyndy. Qala turǵyny Orazǵalı Shermaǵanbetov erte kelip, azamattyq belsendilik tanytty. 

Aqtóbe oblysynda búgin 530 referendým ýchaskesi jumys istep tur. Halyq sanynyń ósýine baılanysty onyń altaýy jańadan quryldy. Oblys ortalyǵynda ornalasqan №1 orta mektep №72 referendým ýchaskesine Orazǵalı Shermaǵanbetov daýys berý bastalǵan sátte kelip, azamattyq belsendiligin tanytty. Zeınetker tańǵy saǵat 07:00-de óz ýchaskesine kelip, tańdaýyn jasap, syılyqqa ıe boldy.

– Elimizde ótken saıası naýqandarǵa qatysyp kelemin. Búgin de Konstıtýtsııalyq quqymdy paıdalanyp, azamattyq belsendilik tanytyp, daýys berýge keldim, - dedi Orazǵalı Shermaǵanbetov. 

Aıta keteıik, qazirgi kezde Referendýmda daýys berý quqyǵy bar 569 845 adam tizimge engen. Onyń 303-ine esepten shyǵarý kýáligi berildi. Bul – azamattardyń ótinishi. Olar ózge oryndarda daýys beredi.