Aqtóbede iri jol apattaryna qatysty qylmystyq ister sotta qaralyp jatyr
AQTÓBE. KAZINFORM – Aqtóbe oblystyq qylmystyq ister jónindegi mamandandyrylǵan aýdanaralyq sotta eki iri jol apatyna qatysty sot otyrysy bastaldy. Birinde 5 adam, ekinshisinde 4 adam kóz jumdy.
Aqtóbe oblystyq qylmystyq ister jónindegi mamandandyrylǵan aýdanaralyq sotynda Samara-Shymkent tasjolynyń Qobda aýdany Álııa aýylynda bolǵan oqıǵaǵa qatysty aıyptaý aktisi oqyldy. Onda kólik rýlinde bolǵan 28 jastaǵy jigittiń sharshańqy kúıde bolyp, jol-kólik qozǵalysy erejesin saqtamaǵany aıtyldy.
- Júrgizýshi qydyryp, 2024 jyldyń 26 tamyzy kúni saǵat 18:40-ta qaýiptiligi joǵary Aqtóbe oblysy Qobda aýdany baǵytynda Volkswagen Polo markaly avtokóligimen joldyń qarama-qarsy baǵytyna shyǵyp ketedi. Nátıjesinde 50 jastaǵy eki adam jáne 2010, 2015, 2019 jyldary týǵan balalar kóz jumdy. Sóıtip júrgizýshi QR Qylmystyq kodekstiń 345 baby 4 bóliginde kózdelgen qylmystyq quqyqbuzýshylyq jasaǵan. Kólik quralyn basqaratyn adam jol júrisi qaǵıdalaryn buzý, abaısyzda eki nemese odan da kóp adamnyń ólimine ákelip soqqan is-áreket jasaǵany úshin aıyptalady,- dedi memlekettik aıyptaýshy Álııa Tleýova.
Aıta keteıik, jol apaty kezinde kóz jumǵan jolaýshylar júrgizýshiniń týystary. Eske salsaq, oqıǵa bıyl tamyzda boldy. Jeńil kólik júrgizýshisi joldyń qarsy baǵytyna shyǵyp, júk kóligimen soqtyǵysqan.
Aqtóbe oblystyq qylmystyq ister jónindegi mamandandyrylǵan aýdanaralyq sotynda Qarǵaly aýdany Aşylysaı aýyly mańynda aýdarylyp qalǵan Toyota Alphard kóliginiń 37 jastaǵy júrgizýshisine qatysty is qaralyp jatyr.
Aıyptaý aktisine súıensek, jolaýshylar ashyq bas-mı jaraqatyn alyp, kóz jumǵan. Sot otyrysy kezinde jábirlenýshiler 20 mln teńge moraldyq, 2,7 mln teńge materıaldyq shyǵyndy óteýdi surady.
Sot otyrysy jalǵasyp jatyr.
