Aqtóbede iri munaı kompanııasy áli de gazdy alaýda jaǵyp otyr
AQTÓBE. KAZINFORM – «SNPS-Aqtóbemunaıgaz» AQ-nyń gaz óńdeý zaýyttarynda byltyr 82 mln tekshe metr gaz alaýda jaǵyldy. Aldaǵy eki jylda onyń kólemi 20 mln tekshe metrge jetýi tıis.
«SNPS-Aqtóbemunaıgaz» AQ-y byltyr 102,837 mln sharshy metr ilespe gazdy jaǵýǵa ruqsat aldy. Ótken jyly kompanııa zaýyttarynda 82,181 mln tekshe metr gaz jaǵyldy.
- Elimizdiń batysyndaǵy Atyraý, Mańǵystaý, Batys Qazaqstan, Qyzylorda jáne Aqtóbe oblystarynda munaı-gaz kompanııalary óte kóp. QR Ekologııalyq zańnamalarynyń talaptaryna sáıkes gazdy alaýda jaǵý barlyq óńirde negizi toqtatyldy. Alaıda «SNPS-Aqtóbemunaıgaz» AQ Jańajol munaı-gaz óńdeý keshenine qarasty zaýyttarda kúni búginge deıin alaýlarda gaz janyp tur. Sol sebepti Jol kartasyna arnaıy engizip, «SNPS-Aqtóbemunaıgaz» AQ-na talap qoıyp otyrmyz. Talap boıynsha gazdy óz kádesine jaratýy tıis. Alaýda jaǵýdy toqtatyp, basqa qajettilikke paıdalanýy qajet, - dedi Aqtóbe oblystyq Ekologııa departamentiniń basshysy Erbol Qýanov.
Jol kartasy oblys ákimimen kelisilip, QR Ekologııa jáne tabıǵı resýrstar mınıstrimen bekitilgen. 2024-2026 jyldarǵa arnalǵan jospar iske assa, ilespe gazdy jaǵý 20 mln tekshe metrge deıin azaıady.
