Aqtóbede iri qurylys bazarynyń qoımasy órtendi
AQTÓBE. KAZINFORM – Tótenshe jaǵdaılar qyzmeti bazar mańynda jedel shtab qurdy. Órt bir saǵattan astam ýaqyttan keıin oqshaýlandy.
Aqtóbe qalasynyń Astana aýdanyndaǵy «Jiger» qurylys bazary aýmaǵynda qoımanyń órtenip jatqany týraly habarlama saǵat 16:40-ta túsken. Arada bir saǵattan astam ýaqyt ótkende órt oqshaýlandy.
- Órtti sóndirýge TJD jedel-qutqarý jasaǵynyń qutqarýshylary, Apattar medıtsınasy ortalyǵynyń mamandary, TJM 20982 áskerı bóliminiń áskerı qyzmetshileri jumyldyryldy. Sondaı-aq jergilikti atqarýshy organ men polıtsııa qyzmetkerleri, jedel járdem brıgadalary bardy. Oqıǵa ornynda jedel shtab quryldy. Órt sóndirýshiler jalynnyń kórshiles nysandarǵa taralýyna jol bermeı, órtti sóndirý boıynsha barlyq qajetti sharalardy qabyldady. Órt oqshaýlandy. Aldyn ala málimet boıynsha, qaza tapqandar men zardap shekkender joq,- dep habarlady Aqtóbe oblystyq TJD baspasóz qyzmeti.
Bazardaǵy órtti sóndirýge ǵımarattyń konstrýktsııasy, metall jabyndy qıyndyq týǵyzǵan. Aqtóbe oblystyq densaýlyq saqtaý basqarmasy baspasóz qyzmetiniń habarlaýynsha, dáriger kómegine eshkim de júginbegen.
Eske salsaq, Almaty oblysy Alataý qalasy patrýldik polıtsııa qyzmetkerleri órtten adamdardy qutqaryp, batyldyq pen janqııarlyq tanytty.
