Aqtóbede iri kólemdegi sıntetıkalyq esirtki tárkilendi

AQTÓBE. KAZINFORM — Aqtóbe oblysynda iri kólemdegi sıntetıkalyq esirtki partııasy tárkilendi, dep habarlaıdy Polisia.kz.

Polıtsııa qyzmetkerleri jedel-izdestirý is-sharalary barysynda garaj kooperatıvteriniń biriniń aýmaǵynda 38 jastaǵy qala turǵynyn ustady. Qyzmettik-izdestirý ıtimen Daewoo Nexia avtokóligin tintý kezinde untaq tárizdi zat salynǵan 43 oram jáne eki tabletka tabylyp, tárkilendi.

— Keıin kúdikti esirtkini býyp-túıý úshin paıdalanǵan garajdy tintý barysynda jertóle bólmesinen untaq tárizdi zaty bar 161 oram, ózine tán ıisi bar zat salynǵan úsh shaǵyn ydys, termometr, zip-paketter, sary jáne jasyl tústi ızolentalar, elektrondy tarazy, sondaı-aq jazbalary bar jumys dápteri tabyldy. Sonymen qatar kúdiktiniń turǵylyqty mekenjaıynda untaq tárizdi zaty bar 44 oram, shamamen 200 bos zip-paket, zattyń qaldyǵy bar plastık bótelkeniń bóligi jáne noýtbýk tárkilendi. Zańsyz aınalymnan jalpy salmaǵy shamamen 500 gramm sıntetıkalyq psıhotroptyq zattar alyndy. Bul — zańsyz taralýy men tutynylýyna jol berilmegen 3 myńnan astam bir rettik doza, — delingen aqparatta.

Kúdikti Qazaqstan Respýblıkasy Qylmystyq-protsestik kodeksiniń 128-babyna sáıkes ustalyp, Aqtóbe qalalyq polıtsııa basqarmasynyń ýaqytsha ustaý ızolıatoryna qamaldy. Asa iri mólsherde esirtki quraldarynyń zańsyz aınalymy faktisi boıynsha sotqa deıingi tergeý amaldary júrgizilip jatyr.

Budan buryn ShQO-da esirtki zerthanasyn uıymdastyrǵan eki er adam 11 jylǵa sottaldy.