Aqtóbede pyshaq jaraqatynan mert bolǵan túlektiń anasy balasy týraly aıtty
AQTÓBE. QazAqparat - Pyshaq jaraqatynan qaza bolǵan mektep túlegi Azat Dúsipovtiń anasy Elvıra Dúsipova balasynyń armandary men sońǵy sózin aıtyp berdi, dep habarlaıdy QazAqparat tilshisi.
Maýsym aıynda qolyna attestat alyp, UBT-ǵa daıyndalyp júrgen Azat Dúsipov úıiniń mańynda pyshaq jaraqatynan kóz jumdy. Buǵan deıin habarlaǵanymyzdaı, kúdikti kámelet jasqa tolmaǵan B. ustalyp, Qylmystyq kodekstiń «Adam óltirý» baby boıynsha tergelip jatyr.
Al qaza bolǵan Azat Dúsipovtiń anasy balasynyń armandary men sońǵy tilegin aıtyp berdi.
«Ulym Azat Almatydaǵy joǵary oqý ornyna túsip, temirjolshy bolýdy armandady. Aqyldy bala edi. Sol kúni ne bolǵanyn áli jete bilmeımin. Balam men úshin ómirinde birinshi ret oraza ustap, «mama, sen úshin, saýyǵyp ketýiń úshin ustaımyn» dep memlekettik emtıhandarǵa qaramaı aýyz bekitti»,- anasy dedi Elvıra Dúsipova.
Qazirgi kezde marqum Azattyń anasy da aıyqpas dertke shaldyǵyp, em qabyldap júr. Marqum Azat Dúsipov sol kúni Ortalyq stadıonda bolǵan fýtboldy tamashalaıdy. Kesh batqan kezde ata-anasy balasyna telefon shalǵanymen, eshkim tutqany kótermegen. Úshinshi ret telefon shalǵanda belgisiz bireý «Azat qan-qan bolyp jatyr» dep habar berdi.
«Júgirip barǵan kezde balam jedel járdem kóliginiń ishinde jatyr eken. «Mama, úıge qaıta ber, bári jaqsy bolady» dep aıtty. Túnde aýrýhanada maǵan úıge barýymdy ótindi. Al dáriger sol kezde ulymnyń jaǵdaıy óte nashar ekenin eskertti. Tańǵy saǵat 5:30-da dáriger telefon shalyp, aýrýhanaǵa kelýimizdi surady. Balam aman qalmady, pyshaq júrekke tıgen eken»,- dedi Elvıra Dúsipova.
Al kúdikke ilikken B. qazir ýaqytsha tergeý ızolıatorynda otyr. Ol da bıyl fızıka-matematıka baǵytyndaǵy daryndy balalar mektep-ınternatyn «Altyn belgimen» bitirdi. Ustazdary kúdiktige alǵyr, qamqor dep minezdeme berip otyr.
«Bala fızıka, matematıkaǵa óte beıim. Oblystyq, respýblıkalyq olımpıadalarǵa qatysyp, júldeger atanyp júr. Altyn belgi ıeleri 15 maýsym kúni attestatyn aldy. UBT daıyndalyp, 127-135 ball jınap júrgen bala edi. Óte kishipeıil bala boldy»,- dedi mektep dırektory Qaragóz Tileýbergenova.
Aıta keteıik, Azat Dúsipovtiń otbasy qazirgi kezde tergeý jumystarynyń júrip jatqanyn, qandaı da bir talap qoımaıtyndaryn jetkizdi.
