Aqtóbede prokýrorǵa 1,5 mln teńge para bergen dırektor kinásin moıyndady
Qylmystyq kodekstiń «Para berý» baby boıynsha iz qozǵalyp, júıke aýrýyna shaldyqqandardy emdeıtin ınternat úıiniń dırektory Klava Pan sot aldynda jaýap berdi. Ol prokýror tekserisiniń esh kedergisiz ótýin qamtamasyz etpek bolǵan. Іs kelisim boıynsha qysqartylǵan tártipte ótti. Búgin №2 Aqtóbe qalalyq sotynda jaryssóz boldy.
«Men óz kinámdy tolyq moıyndaımyn. 21 tamyz kúni prokýrordy úıine deıin jetkizip salyp, sol kezde paketine 1,5 mıllıon teńgeni salyp jiberdim. Dál sol jerde meni ustady. Prokýror páter jaldap turady eken ári ofıtserler kúni boldy. Meniń syılyq jasaǵym keldi. Quzyrly organ ókiline para berip turǵanymdy tolyq túsindim. Negizi aramyzda eki ret para berý týraly áńgime boldy. Biraq prokýror mundaı áreket zańǵa qaıshy ekenin eskertti», - dedi sottalýshy Klava Pan.
Klava Pan uzaq jyldar boıy eńbek etip, zeınetke shyqqan, bir otbasynyń asyraýshysy, jesir. Ol - «Shapaǵat» medaliniń ıegeri, Aqtóbe oblysynyń qurmetti azamaty. Aqtóbe oblysynyń prokýrory Jánibek Tórebekov jaryssózde sottalýshyny bas bostandyǵynan aıyrmaı, bergen parasyn 15 ese qaıtaratyndaı aıyppul salýdy surady.
«Sottalýshynyń kinási tolyq dáleldendi ári sottalýshy óz kinásin moıyndady. Ony kináli dep tanyp, túpkilikti bergen parany 15 ese, ıaǵnı, 22 mıllıon 500 myń teńge etip qaıtaratyndaı sheshim shyǵarýyńyzdy, ómir boıy memlekettik qyzmette jumys isteý quqyǵynan aıyrýdy suraımyz. Para retinde berilgen 1,5 mıllıon teńge zań boıynsha memleket paıdasyna sheshiledi», - dedi prokýror Jánibek Tórebekov.
Jaryssóz kezinde sottalýshy K.Pan bas bostandyǵynan aıyrmaýdy, aıyppul tóleýge daıyn ekenin jetkizdi. Ol aıyppul tóleý úshin óz páterin de satqan.