Aqtóbede poıyzdyń toqtatý kranyn julyp alǵan eki jolaýshy aıyppul tóledi
AQTÓBE. KAZINFORM – Mańǵyshlaq-Almaty, Almaty-Aqtóbe baǵytyndaǵy poıyzǵa mas kúıinde mingen jolaýshylar toqtatý kranyn julyp aldy. Olardy poıyzdan túsirip, aıyppul saldy.
Birinshi oqıǵa «Mańǵyshlaq-Almaty» baǵytyndaǵy poıyzda boldy. Kóliktegi polıtsııa qyzmetkerleri tekserý kezinde Qyzylorda oblysynyń 34 jastaǵy turǵynyn ustady. Ol masań kúıinde poıyzdyń toqtatý kranyn julyp alǵan.
Kóliktegi polıtsııa departamenti baspasóz qyzmetiniń habarlaýynsha, medıtsınalyq tekserý kezinde ortasha dárejeli alkogoldik masańdyq anyqtaldy. Sol kezde quqyq buzýshy poıyzdan túsirilip, qoǵamdyq orynda mas kúıinde júrgeni jáne poıyzdy zańsyz toqtatqany úshin jaýapqa tartyldy. Oǵan 10 aılyq eseptik kórsetkish kóleminde aıyppul salyndy.
- «Almaty – Aqtóbe» baǵytyndaǵy poıyzdyń «Alǵa – Bestamaq» aralyǵynda da dál osyndaı oqıǵa tirkeldi. Bul joly toqtatý kranyn 63 jastaǵy er adam julyp aldy. Ol da mas bolǵan. Kóliktegi polıtsııa akt toltyryp, 10 AEK kóleminde aıyppul saldy,- dep habarlady Kóliktegi polıtsııa departamentiniń baspasóz qyzmeti.
Bıyl Kóliktegi PD qyzmetkerleri 13 myńǵa jýyq ákimshilik quqyqbuzýshylyqty anyqtady. Onyń myńnan astamy ishimdik iship, qoǵamdyq orynda júrse, 10-y krandy julyp alǵan.
