Aqtóbede polıtsııa iske qatysy joq adamdy sotqa súıregen
AQTÓBE. KAZINFORM – Mas kúıinde kólik júrgizý deregin tirkegen kezde rýlde otyrǵan adam ózgeniń qujatyn usynady. Polıtsııa adamnyń túr-turǵasyn naqtylamaı, sotqa ózge adamdy ákeledi. Sot isti toqtatty.
Aqtóbe qalasy mamandandyrylǵan aýdanaralyq ákimshilik quqyq buzýshylyqtar jónindegi sotynyń baspasóz qyzmetiniń habarlaýynsha, polıtsııa mas kúıinde kólik júrgizgen qala turǵynyna ákimshilik hattama toltyrady. Іs Ákimshilik quqyqbuzýshylyq týraly kodekstiń 608-baby 1-bóligi boıynsha qozǵaldy. Eger kinási dáleldense 15 táýlikke qamalyp, kólik júrgizý kýáliginen 7 jylǵa aıyrylady. Alaıda is toqtatyldy.
- Kólikti toqtatqan sátte rýlde bolǵan adam polıtsııa qyzmetkerlerine ózin basqasha tanystyryp, ózgeniń saqtandyrý polısin usynǵan. Keıin alkogoldik masań kúıdi anyqtaý maqsatynda medıtsınalyq kýálandyrýdan ótken. Polıtsııa qyzmetkerlerin jańylystyrǵan, sol sátte júrgizýshiniń jeke basy naqty anyqtalmaǵan. Al is materıaldarynda kólik quralyn qujatta kórsetilgen adamnyń basqarǵanyn rastaıtyn dálel joq. Dáleldemelerdiń bolmaýyna baılanysty is toqtatyldy. Sot qaýlysy zańdy kúshine endi,- dep habarlady Aqtóbe qalasy mamandandyrylǵan aýdanaralyq ákimshilik quqyq buzýshylyqtar jónindegi sotynyń baspasóz qyzmeti.
Aıta keteıik, Túrkistanda birneshe jylǵa kólik basqarý quqyǵynan aıyrylǵanyna qaramaı mas kúıde rólge otyrǵan júrgizýshi ustaldy.
