Aqtóbede polıtsııa qyzmetkerleri kúıeýine qoshtasý hatyn jazǵan áıeldi qutqardy

AQTÓBE. KAZINFORM — Áıel óz úıiniń dárethanasynda asylyp ólmek boldy. Polıtsııa dereý jedel járdem shaqyrdy.

Oqıǵa keshe Aqtóbe qalasynda boldy. Er adam polıtsııaǵa habarlasyp, áıeliniń qoshtasý hat jazǵanyn, onda óz-ózine qol jumsaıtyny týraly aıtylǵanyn jetkizdi. Oqıǵa ornyna patrýldik polıtsııa batalonynyń ınspektorlary Temirbek Sábıt pen Tanbaı Orynbasaruly bardy. 

— Polıtseıler aýlada ornalasqan dárethana ishinde óz-ózine qol jumsamaq bolǵan áıeldi baıqap qaldy. Inspektor arqannan sheship alyp, alǵashqy medıtsınalyq kómek kórsetti. Der kezinde jasalǵan sheshim men kásibı sheberliktiń arqasynda áıel aman qaldy. Ol tórt balanyń anasy, — dep habarlady oblystyq PD baspasóz qyzmeti.

Keıin jedel járdem shaqyryp, aýrýhanaǵa jetkizdi. Aqtóbelik áıel dárigerler baqylaýynda. 

— Polıtsııa qyzmetkeriniń eń basty mindeti — adam ómirin saqtaý. Biz kún saıyn túrli jaǵdaılarǵa tap bolamyz, biraq eń mańyzdysy — der kezinde kómek kórsetý, — deıdi Temirbek Sábıt.

Aıta keteıik, bıyl Mártók aýdanynda 9-synyp oqýshysy, Shalqarda 10-synyp oqýshysy sýıtsıd jasady. Polıtsııa is qozǵap, tergeý júrgizdi.