Aqtóbede polıtsııaǵa qanjar ala júgirgen júrgizýshi májbúrli túrde emdeledi
AQTÓBE. QazAqparat - Aqtóbede birneshe kólikti qaǵyp ketip, keıin qasha jónelgen sottalýshy S.Aǵadıevke qatysty iske úkim shyqty. Ol aldaǵy ýaqytta májbúrli túrde júıke aýrýlary aýrýhanasynda em qabyldaıdy, dep habarlaıdy QazAqparat tilshisi.
Aqtóbede birneshe jol-kólik oqıǵasyn jasap, keıin qashyp ketken sottalýshy Sanat Aǵadıevti polıtsııa qolǵa túsirdi. Biraq ol eskertýge qulaq aspaı, bir qolyna báki, ekinshi qolyna qanjar ustap, adamdardy qorqytqan. Eskertý retinde aspanǵa oq atyldy. Osy oqıǵa boıynsha «Buzaqylyq», «Bılik ókilin qorlaý», «Bılik ókiline qatysty kúsh qoldaný» baptarymen is qozǵaldy.
Búgin №2 qalalyq sotynyń sýdıasy Erbol Ábdihalyqov sottalýshy S.Aǵadıevti májbúrli túrde júıke aýrýlary aýrýhanasyna emdeýge jiberýge úkim shyǵardy. Sonymen qatar, ol jábirlenýshilerdiń kóligin jóndeý úshin 1 mıllıon teńge materıaldyq shyǵyndy tóleýi tıis.
