Aqtóbede polıtsııa pyshaq ala júgirgen júrgizýshige qarsy qarý qoldandy
ASTANA. QazAqparat - Aqtóbede polıtsııa qyzmetkeri pyshaq ala júgirgen júrgizýshini toqtatý úshin qarý qoldandy. Bul týraly QR Іshki ister mınıstrliginiń resmı ókili Almas Sadýbaev aıtty, dep habarlaıdy QazAqparat tilshisi.
Áleýmettik jelide taraǵan vıdeo materıalda bir mashınany polıtsııa kóliginiń qýyp kele jatqandyǵy, bir mezette tapansha daýysynyń estilgendigi beınelengen. Sondaı-aq vıdeony túsirip otyrǵan adamdar kúdiktiniń granat sııaqty kúdikti zatty laqtyrǵanyn da aıtady.
Osy vıdeoǵa qatysty túsinikteme bergen Almas Sadýbaev vıdeo materıalda Aqtóbe oblystyq ІІD polıtsııa qyzmetkerleri jol-kólik oqıǵasyn jasap, boı tasalamaq bolǵan júrgizýshini ustaý sáti beınelengenin aıtty.
«Quqyq buzýshy polıtsııa talabyn oryndamaı, olarǵa pyshaq ala júgirip qarsylyq tanytty jáne ótip bara jatqan adamdarǵa qaýip tóndirdi. Polıtsııa qyzmetkerleri tabeldik qarý paıdalanyp, aýaǵa eskertý oǵyn atty. Nátıjesinde buzaqy qolǵa tústi. Azamattyq tulǵalar da, polıtsııa qyzmetkerleri de zardap shekken joq», - dedi ol.
Resmı ókildiń deregine qaraǵanda, ustalǵan azamatty medıtsınalyq tekserýden ótkizý barysynda onyń esirtkige elitip alǵany belgili bolǵan.
