Aqtóbede polıtsııa men TJ qyzmeti jolda qalǵan ózbekstandyqtarǵa kómektesti
AQTÓBE. QazAqparat – Samara – Shymkent tasjolynda avtobýstary buzylyp, jolda qalǵan ózbekstandyq jolaýshylarǵa polıtsııa men tótenshe jaǵdaılar qyzmeti kómektesti, dep habarlaıdy QazAqparat tilshisi.
Oqıǵa búgin saǵat 7:00 shamasynda boldy. Samara – Shymkent tasjolynyń Áıteke bı aýdany, Belqopa aýyly mańynda shaǵyn avtobýs tehnıkalyq aqaýǵa baılanysty turyp qalǵan.
«Avtobýs ishinde 21 adam boldy. Onyń ekeýi áıel. Shymkentten Máskeýge baǵyt alǵan jolaýshylardyń bári Ózbekstan azamattary. Polıtsııa men tótenshe jaǵdaılar qyzmeti shuǵyl qutqarý jumystaryn júrgizip, olardy Qarabutaq aýylyndaǵy kempıngke jetkizdi», - dedi oblystyq PD baspasóz qyzmetiniń jetekshisi Erbolat Sarqulov.
Aıta keteıik, jolda qalǵan avtobýs jolaýshylaryna kómekke Órt sóndirý jáne avarııalyq-qutqarý jumystary qyzmeti men №10 órt sóndirý postynyń jeke quramynan 2 adam, bir tehnıka, sonymen qatar medıtsınalyq-qutqarý beketinen tórt adam bardy.
