Aqtóbede polıtsııa qyzmetkerleriniń sany qysqaryp, jalaqysy ósti
AQTÓBE. QazAqparat – Aqtóbe oblystyq polıtsııa departamentinde 300-ge jýyq qyzmetker qysqartylyp, únemdelgen qarjy eńbekaqyny ósirýge múmkindik berdi, dep habarlaıdy QazAqparat tilshisi.
Aqtóbe oblystyq PD bastyǵynyń mindetin atqarýshy Qanat Álıev oblystaǵy krımınogendik jaǵdaıdyń jaı-kúıi, sondaı-aq ІІM júıesindegi reforma sheńberinde qabyldanyp jatqan sharalar týraly qysqasha baıandady. Alǵashynda 287 shtattyq birlik qysqartyldy. Onyń 26-y basshylyq laýazym. Esesine jergilikti polıtsııa qyzmetiniń júıesin «servıstik polıtsııa» qaǵıdatymen jetildirý jobasy sheńberinde jańa tetikter, quraldar men jumys ádisteri engizilip jatyr.
«Bıyl oblys ortalyǵynda 5 statsıonarlyq polıtsııa beketi ornatyldy. Onda azamattar táýliktiń kez kelgen ýaqytynda barlyq suraq boıynsha júgine alady. Sondaı-aq, biz eń krımınogendik ýchaskelerdi anyqtadyq. Al Jol kartasyn júzege asyrý aıasynda 5 jyl ishinde 12 statsıonarlyq modýldik beket pen 16 ýchaskelik polıtsııa pýnktin salý josparlanǵan. Oblystyq PD aldyna qoıylǵan mindetterdiń biri – bul polıtsııa bólimsheleriniń úı-jaılarynda, atap aıtqanda arnaıy mekemelerde, azamattardy ýaqytsha ustaý bólmelerinde, qarýdy saqtaý jáne berý bólmelerinde, kezekshi bólimderde, ishinara tergeýshiler men anyqtaýshylardyń kabınetterinde jappaı beınebaqylaý júıesin engizý. Búgingi tańda 979 beınekamera ornatylǵan», - dedi Aqtóbe oblystyq PD bastyǵynyń mindetin atqarýshy Qanat Álıev.
Aqtóbe oblysy ákiminiń birinshi orynbasary Rýslan Hambarov, oblystyq máslıhatynyń depýtattary men qoǵamdyq keńes músheleri Jedel basqarý ortalyǵynyń jumysymen tanysty. Olarǵa telefondaǵy qosymshanyń kómegimen qylmystar men oqıǵalar týraly beıne habarlama jiberýge bolatyn «Omnıkanaldylyq» júıesiniń jumysy kórsettildi. Qanat Álıev depýtattardy «Azamattarǵa arnalǵan qabyldaý» bólmesine ótkizip, modýldik statsıonarlyq beket pen ýchaskelik polıtsııa pýnktiniń jumysymen tanystyrdy.
Jalpy, óńirdegi jedel jáne qoǵamdyq-saıası jaǵdaı turaqty. Jeke quram Memleket basshysy men Іshki ister mınıstrliginiń alǵa qoıǵan óńirdegi quqyqtyq tártipti qamtamasyz etýge, halyqtyń senim deńgeıin arttyrýǵa jáne azamattardyń barlyq ózekti saýaldaryna jedel den qoıýǵa baǵyttalǵan. Qoǵamdyq oryndarda jáne kóshelerde retsıdıvti, toptyq, mas kúıinde jasalǵan jáne kámeletke tolmaǵandar arasyndaǵy qylmystar azaıdy. Kezdesý sońynda Rýslan Hambarov jergilikti atqarýshy organdar quqyq qorǵaý organdaryn ozyq tehnıkalyq quraldarmen jabdyqtaý boıynsha jan-jaqty kómek kórsetetinine senim bildirdi.
