Aqtóbede polıtsııa qyzmetkerleriniń kabınetine beınekamera ornatylady

AQTÓBE. QazAqparat - 1 jeltoqsanǵa deıin Aqtóbedegi polıtsııa qyzmetkerleriniń kabınetine beınekamera ornatylady, dep habarlaıdy QazAqparat tilshisi.

Іshki ister mınıstriniń orynbasary Sáken Sársenov Aqtóbede Prezıdenttiń qaýipsizdikti qamtamasyz etý salasyndaǵy tsıfrlandyrý jónindegi tapsyrmalarynyń iske asyrylýyn zerttedi. Jumys sapary aıasynda QR ІІM orynbasary Sáken Sársenov oblystyq bilim berý uıymdary ortalyǵynda (mektepter, balabaqshalar, arnaýly orta oqý orny, JOO) beınebaqylaý júıesiniń engizilýimen tanysty.
S.Sársenov jappaı beınebaqylaý júıesin engizý barysyn, polıtsııa qyzmetkerleriniń kómegimen Jedel basqarý ortalyǵyn jańǵyrtýdy (ashyq platformaǵa kóshý), «Azamattardyń habarlamalaryn birjaqty qabyldaý» jobasyn iske asyrýdy, polıtsııa narıadtarynyń geoderekterin GPS trekerlerinen elektrondyq kartaǵa aýystyrýdy zerttep, kólik aǵynyn baqylaý júıesimen tanysty.
Іshki ister mınıstriniń orynbasary Aqtóbe oblysynyń ákimimen kezdesti. Kezdesýde Memleket basshysynyń qylmystyq isterdi tergep-tekserýdi elektrondyq formatqa kóshirý, sondaı-aq halyqpen ózara is-qımyl jasaıtyn tergeýshilerdiń, jedel ýákilderdiń jáne ishki ister organdarynyń basqa da qyzmetkerleriniń kabınetterinde beınebaqylaý kameralaryn ornatý jónindegi tapsyrmalarynyń óńirde iske asyrylý barysy talqylandy.
«Ákimdik tarapynan qajetti materıaldyq qoldaý kórsetildi. 1-jeltoqsannan bastap barlyq kabınetterde kameralar bolady dep oılaımyn», - dep atap ótti Sáken Sársenov.
Odan ári №23 jáne №64 jalpy bilim beretin mektepterdegi qaýipsizdiktiń tehnıkalyq qamtamasyzdandyrý jaǵdaıymen tanysty, «Qulager» balabaqshasyna jáne Aqtóbe polıtehnıkalyq kolledjine bardy, uıymdardaǵy shtattan tys jaǵdaılar kezindegi is-qımyl tártibin baǵalady.
Sapar sońynda Іshki ister mınıstriniń orynbasary Sáken Sársenov Alǵa jáne Hromtaý aýdany polıtsııa bólimderiniń jabdyqtalýymen jáne ishki ister organdarynyń qyzmetkerleri paıdalanatyn tehnıkalyq quraldarmen tanysty.