Aqtóbede polıtsııa qyzmetkerleri tórt mektepten bomba izdedi

AQTÓBE. QazAqparat – Aqtóbede belgisiz bireý mektepterde jarylǵysh zat bar degen habarlamany polıtsııaǵa jibergen. Polıtsııa tórt bilim ordasynyń oqýshylaryn evakýatsııalady, dep habarlaıdy QazAqparat tilshisi.

Búgin Aqtóbe oblystyq polıtsııa departamentine Nazarbaev zııatkerlik mektebi, № 2, 14 jáne 31 orta mektepterinde jarylǵysh zat bar degen habarlama tústi.

Oqıǵa ornyna shuǵyl qyzmetter men saperler toby bardy. Ǵımaratta jarylǵysh qurylǵylardyń bar-joǵyna tekserý uıymdastyryldy.

Tekserý nátıjesinde jarylǵysh zat tabylǵan joq.

«Polıtsııa departamenti anonımdi habarlamanyń avtoryn anyqtaý jáne kúdiktini ustaý úshin jedel sharany qolǵa aldy. Atalǵan fakti boıynsha Qylmystyq kodekstiń «Terrorızm aktisi týraly kórineý jalǵan habarlaý» baby boıynsha sotqa deıingi tergeý bastaldy. Aqtóbe oblysynyń Polıtsııa departamenti terrorızm aktisi týraly kórineý jalǵan habarlaý qylmystyq quqyq buzýshylyq bolyp tabylatynyn jáne QR QK 273-babynda kózdelgen qylmystyq jaýaptylyqqa ákep soǵatynyn eske salady», - dep habarlady oblystyq PD baspasóz qyzmetiniń jetekshisi Erbolat Sarqulov.

Eske salsaq, bıyl oblystaǵy sot ǵımarattarynyń beseýine bomba qoıylǵany týraly habarlama da tekserildi. Polıtsııa tekserýden soń bomba tabylmaǵanyn málimdedi.

Al byltyr alǵashqy qońyraý kezinde 6 mektepke «bomba qoıylǵany» aıtylyp, tekserildi.