Aqtóbede polıtsııa qyzmetkeriniń jaǵasyna jarmasqandar jazalandy
AQTÓBE. QazAqparat - Aqtóbede belgilenbegen orynda temeke shegip, polıtsııa qyzmetkerlerine baǵynbaǵan eki aıyptalýshyǵa úkim shyqty. Olar polıtsııa qyzmetkerleriniń jaǵasyna jarmasyp, olarǵa qol jumsaǵan, dep habarlaıdy QazAqparat tilshisi.
№2 Aqtóbe qalalyq sotynda Qylmystyq kodekstiń «Quqyq qorǵaý organy, arnaýly memlekettik organ qyzmetkeriniń, áskerı qyzmetshiniń ómirine qolsuǵýshylyq» baby boıynsha is qaraldy. Aıyptalýshy Jandos Janaı men Qoja-Ahmet Jańbyrbaev jol-patrýldik polıtsııa qyzmetkerleri A.Aqqulan men R.Aınazarovqa baǵynbaǵan.
Іs materıalyna súıensek, jol-patrýldik basqarmasynyń qyzmetkerleri kúndelikti tártipti baqylaý úshin kóshede júredi. Sol kezde qaladaǵy dúkenderdiń biriniń aldynda, belgilenbegen jerde temeki shegip turǵan aıyptalýshylar polıtsııa qyzmetkerleri jaqyndaǵan kezde onyń tuqylyn jerde laqtyra salǵan. Quqyq qorǵaýshylar ákimshilik jaýapqa tartylatyndaryn aıtyp, olardyń jeke kýálikterin surady. Qujattary bolmaǵan soń jaqyn mańdaǵy polıtsııa beketine birge barý qajet ekenin aıtyp, ere júrgen. Іshimdik ishken aıyptalýshylar polıtsııa qyzmetkerlerine dóreki sózder aıtyp, jol-patrýldik qyzmetkeri A.Aqqulandy uryp, tepkileıdi.
Polıtsııa qyzmetkerleri jeńil jaraqat alǵan. Sol jerde aıyptalýshylar olardyń ratsııalaryn laqtyryp, qyzmettik kúrteshesin jyrtty. Tipti, beınekamerany tirkeý qurylǵysyn syndyrdy. Sot otyrysy kezinde eki aıyptalýshy da óz kánilaryn moıyndap, bas bostandyǵynan aıyrmaýdy surady. Sot-medıtsınalyq saraptamasy eki polıtsııa qyzmetkeriniń jeńil jaraqattanǵanyn rastady.
«Jandos Janaı Qylmystyq kodekstiń «Quqyq qorǵaý organy, arnaýly memlekettik organ qyzmetkeriniń, áskerı qyzmetshiniń ómirine qolsuǵýshylyq» baby boıynsha aıypty dep tanylyp, 3 jyl 6 aı bas bostandyǵynan shekteý jazasy taǵaıyndalsyn. Qoja-Ahmet Jańbyrbaev Qylmystyq kodekstiń 380-babynyń 1-bóligimen qaralǵan qylmysty jasaǵany úshin kináli dep tanylsyn, oǵan 2 jyl 1 aı merzimge bas bostandyǵyn shekteý jazasy taǵaıyndalsyn. Sonymen qatar, aıyptalýshy Jandos Janaı jergilikti atqarýshy organdar aıqyndaıtyn oryndarda 200 saǵatqa májbúrli eńbekke tartylsyn»,- dedi sýdıa Aınur Bekmuhambetova.
Sot úkimi zańdy kúshine endi.
