Aqtóbede polıtsııa qyzmetkerine baǵaly tondar men altyn buıymdardy urlady degen aıyp taǵyldy
AQTÓBE. QazAqparat - №2 Aqtóbe qalalyq sotynda Sazdy polıtsııa bóliminiń qyzmetkeri Altynbek Qalaýovqa qatysty sot otyrysy bastaldy. Kámeletke tolmaǵandardyń isi jónindegi ınspektor Qylmystyq kodekstiń «Urlyq» baby boıynsha aıyptalýda, dep habarlaıdy QazAqparat tilshisi.
Páter tonaý deregi ótken jyldyń 3 qarashasy kúni tirkelgen. Sol kúni jábirlenýshi Dana Esenbekova páterine kelgen kezde esiktiń ashyq turǵanyn kórip, polıtsııa qyzmetkerlerin shaqyrady. Anasy Zıbagúl Esenbekova bul kezde jumys babymen Astana qalasynda bolǵan. Qyzymen telefon arqyly sóılesken ol búgin sot otyrysynda jaýap berdi.
«Polıtsııa qyzmetkerleri páterde qoldy bolǵan zattardy tizimge alyp, oqıǵany tirkedi. Keıin men Sazdy polıtsııa bólimine baryp, istiń qalaı júrip jatqanyn bildim. Bir kúni Ortalyq bazarǵa et pen balyq satyp alý úshin baryp, bazar ishindegi altyn buıymdar satatyn dúńgirshekten ózime tıesili bilezik pen syrǵany kórdim. Dereý polıtsııaǵa habar berip, altyn buıymdardy qyzymnyń klastasy Ǵalııa Álpeıisovanyń tapsyrǵany anyqtaldy. Bul kórinis beınebaqylaýǵa túsip qalǵan», - dedi jábirlenýshiniń anasy Zıbagúl Esenbekova.
Jábirlenýshi Dana Esenbekova men kýáger Ǵalııa Álpeıisova bir synypta oqyǵan. Synyptastar kezdesýinde barǵan kezde aıyptalýshy Altynbek Qalaýov súıiktisi Ǵ.Álpeıisovaǵa azyq-túlik aparyp, keıin kesh aıaqtalǵan soń úıine jetkizip tastaǵan. Sol kúni jábirlenýshi D.Esenbekova páter kiltin joǵaltyp aldy. Boljam boıynsha, sol keshte kilt urlanǵan.
«Men altyn buıymdar taqpaımyn. Muny maǵan Altynbek syıǵa berdi. Qajet bolmaǵan soń bazarǵa aparyp sattym», - dedi kýáger Ǵ.Álpeıisova.
Sot otyrysy kezinde aıyptalýshy A.Qalaýov óz kinásin múlde moıyndaǵan joq. Іs materıaldaryna súıensek, aıyptalýshynyń páterin tintý kezinde úıindegi kúrteshe ishinen altyn buıymdar tabyldy. Al tondar men fotoapparat, saǵat ázirge esh jerde joq.
Aıta keteıik, páterde quny 3 mıllıon teńgeniń tondary men gaýhar tasty altyn áshekeıler, fotoapparat, aqsha men taza altynnan quıylǵan estelik manetalar saqtalǵan. Jalpy shyǵyn kólemi 6 mıllıon teńgege jetedi.
