Aqtóbede polıtsııa kóligi mototsıklmen soqtyǵysty
AQTÓBE. QazAqparat - Aqtóbedegi Keńes Nokın dańǵylynda polıtsııa kóligi men mototsıkl soqtyǵysty. Mototsıkl júrgizýshisi men jolaýshysy túrli dene jaraqatymen aýrýhanaǵa tústi, dep habarlaıdy QazAqparat tilshisi.
Jazda qala kóshesinde mototsıkl kóbeıdi. Keshe saǵat 22:40-ta 23 jastaǵy mototsıkl júrgizýshisi qarsy baǵytqa shyǵyp ketip, polıtsııanyń «Gaz-2705» kóligimen soqtyǵysty.
«Polıtsııanyń Gazel kóligi qoǵamdyq tártip pen qaýipsizdikti baqylaýǵa shyqqan bolatyn. Al mototsıkl júrgizýshisi qarsy baǵytqa shyǵyp ketip, jol erejesin buzdy. Jol-kólik oqıǵasy saldarynan mototsıkl júrgizýshisi men 20 jastaǵy jolaýshy túrli dene jaraqatyn alyp, aýrýhanaǵa jetkizildi. Ári mototsıkl ıesiniń júrgizýshi kýáliginde arnaıy kategorııa bolmaı shyqty. Qazir osy oqıǵaǵa baılanysty tergeý júrip jatyr», - dep habarlady oblystyq ІІD baspasóz qyzmeti.
