Aqtóbede polıtsııa qarbyz satýshy kásipkerdiń ólimin asha almady
AQTÓBE. QazAqparat - Aqtóbede qarbyz satyp turǵan jerinen qymbat kólikke minip ketip, keıin denesi tabylǵan Erhan Tileýimbetovtiń ólimi ashylmady. Aqtóbe polıtsııasy kásipkerdiń otbasyna kúdiktini taba almaǵanyn habarlap, qaýly tapsyrdy, dep habarlaıdy QazAqparat tilshisi.
«Polıtsııa 30 qazan kúni qolyma qaýly ustatty. Onda qylmystyq quqyq buzýshylyq jasaǵan adamnyń anyqtalmaýyna baılanysty isti toqtatatynyn habarlady. Bir Aqtóbeniń ishinen «Toyota Land Cruiser 200» kóliginiń ıesin taba almaýy, bazar ishinde kórgen adamdardyń sózinen fotorobot jasalmaǵany kóńilge kúdik uıalatady. Sondyqtan men Bas prokýrordyń qabyldaýyna jazylyp, kezdesýdi josparlap otyrmyn», - dedi Erhan Tileýmibetovtiń anasy Raıhan Esenamanova.
Eske salsaq, Erhan Tileýimbetov 2017 jyly 3 tamyzda bazarǵa baryp, keıin iz-túzsiz joǵalyp ketti. Eki balanyń ákesin jan-jaqtan izdeý jumystary júrgizilgenimen, polıtsııa qyzmetkerleri beınekameradan kóliktiń nómirin anyqtaı almady. Sharasyz kúıge túsken Raıhan Esenamanova jalǵyz ulyn ustap otyrǵan adamdarǵa úndeý joldap, bosatýyn surady. Al 2017 jyldyń qyrkúıeginde Erhan Tileýimbetovtiń máıiti bólshektelgen kúıinde tabylyp, týystary ony kıimi arqyly tanydy.
