Aqtóbede polıtsııa departamenti bastyǵynyń eks-orynbasary sottaldy
AQTÓBE.QazAqparat - Aqtóbe qalalyq sotynda oblystyq polıtsııa departamenti bastyǵynyń eks-orynbasary Altaı Ańshybaevqa úkim shyqty, dep habarlaıdy QazAqparat tilshisi.
Aqtóbe oblystyq polıtsııa departamenti bastyǵynyń eks-orynbasary Altaı Ańshybaev 2018 jyldyń mamyr aıynda ustalyp, qamaldy. Buǵan deıin habarlaǵanymyzdaı, oǵan qatysty Qylmystyq kodekstiń «Senip tapsyrylǵan bóten múlikti ıemdenip alý nemese talan-tarajǵa salý» baby boıynsha is qozǵalǵan. Búgin Aqtóbe qalalyq sotynda úkim oqyldy.
«Altaı Ańshybaev Qylmystyq kodekstiń «Senip tapsyrylǵan bóten múlikti ıemdenip alý nemese talan-tarajǵa salý» baby boıynsha aıypty dep tanylyp, 5 jylǵa bas bostandyǵynan aıyrý jazasy taǵaıyndalsyn. Jazasyn qylmystyq atqarý júıesiniń qaýipsizdigi ortasha mekemesinde ótesin», - dedi sýdıa Gúlnar Tlepova. Sonymen qatar, sottalýshy Aqtóbe oblystyq polıtsııa departamentine 5,5 mıllıon teńge shyǵyndy óteýi tıis. Eks-orynbasar polıtsııa polkovnıgi sheninen de aıyryldy.
Aıta keteıik, sot otyrysyna oblystyq polıtsııa departamentiniń qyzmetkerleri qatysty.
