Aqtóbede polıtsııa bastyǵynyń orynbasary úılerdi aralap júr
AQTÓBE. QazAqparat – Aqtóbe polıtsııasy úılerdi aralap halyqpen kezdesti, jolda júrgizýshilerdiń suraǵyna jaýap berdi, dep habarlaıdy QazAqparat tilshisi.
13-14 qyrkúıek aralyǵynda óńirde «Joldaǵy qabyldaý» sharasy ótip jatyr. Jyl basynan beri mundaı qabyldaý jeti ret ótkizilip, 7 myńnan astam adamnyń ótinishi, aryzy qabyldandy. Olardyń árqaısysy naqty jaýabyn da aldy.
«Aqtóbe oblystyq Polıtsııa departamentiniń birinshi orynbasary Qanat Álıev pen ákimshilik polıtsııasy, jergilikti polıtsııa men kóshi-qon qyzmetiniń bastyqtary turǵyndar kóp jınalatyn oryndarda qabyldaý ótkizdi. Azamattar aldyn ala jazylmaı-aq birden polıtsııa qyzmetiniń bastyqtarynan ózderin tolǵandyrǵan túıtkildi máselelerdi surady. Sharaǵa ákimdiktiń ókilderi men jeke páter ıeleri kooperatıvteriniń basshylary qatysty. Negizinen saýaldar kópqabatty turǵyn úılerdiń aýlalaryndaǵy kólik turaǵy men jol qozǵalysy erejeleriniń belgileri ornatylmaýyna qatysty boldy. Kólik tirkeý de ózekti. Qazir Reseı men Armenııadan tasymaldanyp jatqan kólik kóp, ony tirkeý máselesi júrgizýshilerdi alańdatady», - dep habarlady oblystyq PD baspasóz qyzmetiniń jetekshisi Erbolat Sarqulov.
Jergilikti polıtsııa qyzmeti qalanyń kóp qabatty úıler ornalasqan segiz mekende turǵyndardy qabyldady. Turǵyndar qoqys shyǵarý, kólik turaǵy, balalar alańy týraly shaǵymdaryn aıtty. Ýchaskelik ınspektorlardyń jumysyn odan ári jetildirý jaıy da nazarǵa alyndy. Ári saýaldar naqty sheshilýi úshin Aqtóbe qalasynyń turǵyn úı - kommýnaldyq sharýashylyq bólimine joldandy.
