Aqtóbede polıtseıler kıberqylmysty ashý úshin únemi biliktiligin arttyryp otyrady
AQTÓBE. QazAqparat - Aqtóbede áli de qalta urlyǵy, mal urlyǵy, alaıaqtyq qylmystary azaıar emes. Turǵyndarǵa eskertý berilgenimen, bıyl alaıaqtyq boıynsha 166 is tirkeldi, dep habarlaıdy QazAqparat tilshisi.
«Aqtóbe» telearnasynyń «Aqparattyq saǵat» baǵdarlamasynda óńirdiń krımınogendik ahýaly, quqyqbuzýshylyqty boldyrmaý jaıy aıtyldy. Oblystyq PD krımınaldyq polıtsııa basqarmasynyń bastyǵy Serik Shalharov aldymen mal urlyǵyna toqtaldy.
«Mal urlyǵy kóktemde emes, kúzde kóbeıedi. Kúzde soǵym kezi bastalady. Jyl basynan beri 41 is tirkeldi. Onyń 15-i ashylmaı tur. Qysta dalalyqqa qaraýsyz jiberedi keıde. Joǵalǵanda ózderi izdep, polıtsııaǵa kesh habarlasady. Borandy kúni kóbine jylqy yǵyp ketedi. Tabylatyn kezi bolady. Kúni keshe Baıǵanın aýdanynda úsh qylmystyq is qysqardy. Barlyǵy 16 bas mal tabyldy. Іzdeýge keıde qoǵamdyq baqylaýshylar da kómektesedi»,- dedi Serik Shalharov.
Sonymen qatar alaıaqtyq isiniń túri kóbeıdi. Kóbine ózin «bank qyzmetkerimin» dep tanystyryp, habarlasatyn adamdarǵa aldanady.
«Buryn urlyq kóp bolsa, sońǵy eki jarym jylda ınternet alaıaqtyq kóbeıdi. Pandemııa kezinde adamdar tapsyrysty onlaın berdi. Qazir bizde 166 is tirkeýli tur. Byltyrmen salystyrǵanda 12% tómendegen. Biraq toqtaǵan joq. Qylmystyń osy túri artqan kezde bir adam emes, kıberqylmysqa qarsy kúres bólimi ashyldy. Bul qyzmetkerlerge talap erekshe. Arnaıy dıplomy bolýy kerek. Olar únemi biliktiligin arttyrady. Jańa baǵyty kezdesse, beıimdeledi. Bir eskere ketetin jaıt. Tek Aqtóbede emes, respýblıka sondaı. Ákki adamdar basqa oblysta, elde otyryp, aqsha jymqyra beredi. Kóbi Reseıden ekeni anyqtalyp jatyr. Halyqaralyq kelisim aıasynda jumys isteýge týraly keledi. Asa aýyr, aýyr qylmystar da bar»,- dedi oblystyq PD krımınaldyq polıtsııa basqarmasynyń bastyǵy Serik Shalharov.
Qazir Aqtóbede polıtsııa qyzmetkerleri oqý jylynyń sońynda qolyna dıplom alatyn jastarmen kezdesip, jumysqa shaqyryp júr. Olarǵa birneshe bos jumys orny usynyldy.
«Polıtsııa qyzmetkeri bolatyn adam jaýapkershilikti sezinýi kerek. Kıim kıgen soń bári bizge qaraıtyny sózsiz. Máselen 20 avtokólik kele jatsa, onyń ishinde ózgege emes, polıtsııaǵa nazar aýdarady. Kólik ishinde beldik taqty ma, maska taǵyp otyr ma? Bárin qadaǵalaıdy. Qazir Servıstik polıtsııa qyzmetine kóship jatyrmyz. Bul Prezıdentimizdiń qoıǵan talaby. Aqtóbe qalasy, Astana aýdany birinshi qalalyq bóliminde pılottyq joba iske asyryldy. Qadamdyq qoljetimdilik nazarǵa alynǵan. Osylaısha jańa júıe engizile beredi»,- dedi oblystyq PD Jergilikti polıtsııa qyzmeti basqarmasynyń bastyǵy Ardana Saımaǵambetov.
