Aqtóbede polıtseıler gazǵa ýlanǵan sheteldikterdi qutqaryp qaldy
AQTÓBE. QazAqparat – Aqtóbede sheteldikter jolda qalyp, olardyń týystary polıtsııadan kómek surady. Kólikti «Soltústik aınalma jol» baǵytynan tapqan quqyq qorǵaýshylar eki adamnyń ýlanyp qalǵanyn anyqtady, dep habarlaıdy QazAqparat tilshisi.
Túnde polıtsııa qyzmetkerleri jol boıynda qalǵan sheteldikterdi qutqardy.
Oblystyq polıtsııa departamenti baspasóz qyzmetiniń habarlaýynsha, Tájikstannyń eki azamaty «GAZel» avtokóligimen Aqtóbe qalasynan Álimbet shekara beketine jolǵa shyqqan.
Olar shekaradan óte almaǵan. Keıin Aqtóbe qalasyndaǵy týysqandarynyń úıine qaıtaýdy josparlaǵan.
«Qaıtar jolda olarmen baılanys úzildi. Jeldiń jyldamdyǵy artyp, uıytqydy, aıaz kúsheıdi. Ýaıymdaǵan týysqany 102 telefonyna qońyraý shalyp, patrýldik polıtsııa rotasynyń ekıpajdary dereý habar-osharsyz ketken adamdardy izdeýge kiristi. Tún ortasynda «Soltústik aınalma joly» avtojolynyń on ekinshi shaqyrymyndaǵy «Islambulaq» kempınginiń turaǵynda kólikti tabyldy. Júrgizýshi men jolaýshy avtokólik salonynda ýly gazdan ýlanyp uıyqtap qalǵan. Polıtseıler zardap shekkenderdi kólikten shyǵaryp, alǵashqy medıtsınalyq kómek kórsetti, dárigerlerdi shaqyrdy. Dárigerler zardap shekkenderdiń birin jedel járdem kóligine jatqyzdy. Al ekinshisin qyzmettik avtokólikke mingizip, medıtsınalyq mekemege jetkizdi. Qazirgi ýaqytta sheteldikter jansaqtaý bólimine jatqyzyldy», - dedi oblystyq PD baspasóz qyzmetiniń jetekshisi Erbolat Sarqulov.
