Aqtóbede polıtseı júrgizýshini toqtatý úshin tapanshamen atty
AQTÓBE. QazAqparat - 23 sáýirde Qarǵaly aýdanynda polıtsııanyń aǵa serjanttary D.Qalymov pen T.Beketov «Mazda-323» markaly kóligin toqtatty. Keıin belgili bolǵandaı, kólikti basqarǵan 23 jastaǵy Aqtóbe turǵyny buryn krımınaldyq esepte bolǵan.
Ol jáne buryn qylmystyq esepte turǵan 27 jastaǵy jolaýshymen birge kólikte syra ishken.
Polıtseıdiń qujat kórsetý talabyna baǵynbaǵan júrgizýshi tártip saqshysyn qaǵyp ketken. Polıtsııanyń aǵa serjanty T. Beketov kóliktiń kapotyna sekirip shyǵady. Ekinshi polıtseı, aǵa serjant D.Qalymov «Skoda Rapid» qyzmettik kóligimen zań buzýshynyń sońynan qýǵan.
Kapotta jatqan Beketov eskertý retinde aspanǵan qarýymen oq atqan. Júrgizýshi muny elemegen. Alaıda kólik batpaqty sýǵa kirip ketip toqtaǵan.
Beketov ashyq tereze arqyly kólikke kirmek bolǵan. «Mazda» jolaýshysy syra bótelkesin syndyryp, onyń synyǵymen polıtseıdiń aıaǵyn jaraqattady. Tártip saqshysy «Mazda» jolaýshysynyń aıaǵyna atyp, áriptesimen birge zań buzýshylardy ustady.
Oblystyq ІІD baspasóz qyzmetiniń habarlaýyna, «Mazda» júrgizýshisi ustalyp, ýaqytsha ustaý oqshaýlaǵyshyna qamaldy. Al, ekinshisi jaraqatymen Aqtóbe aýrýhanasyna jetkizildi. Polıtsııanyń aǵa serjanty T.Beketovtiń aıaǵynda tilingen jaraqaty boıynsha aýrýhanada kómek kórsetildi.
Atalǵan oqıǵa boıynsha QR QK-niń 380-baby boıynsha qylmystyq is qozǵaldy. Bul bap boıynsha aıyptyǵa 5-ten 10 jylǵa deıin bas bostandyǵynan aıyrý qarastyrylǵan.
