Aqtóbede polıtseı «Zenanyń» isi sotta qaralýda
AQTÓBE. QazAqparat - Aqtóbede kópshilikke «Zena» laqap atymen tanymal jol-patrýldik polıtsııa qyzmetkeri Jannat Ahetova tanysyn qutqarý úshin jalǵan hattama jasatqan, dep habarlaıdy QazAqparat tilshisi.
Aqtóbe oblystyq Іshki ister departamentiniń Ákimshilik polıtsııa basqarmasynda jol-patrýldik polıtsııa qyzmetkeri bolyp jumys isteıtin Jannat Ahetova Qylmystyq kodekstiń «Laýazymdyq ókilettilikterdi teris paıdalaný» baby boıynsha aıyptalyp jatyr. Oqıǵa 2016 jyldyń qyrkúıek aıynda bolǵan. Sol kúni áriptesi Mıras Ibadýllaev Aqtóbe qalasy Ábilqaıyr han dańǵyly boıynda jol erejesin buzǵan kólikti toqtatady. Kólik júrgizýshisi Ábdramanova ákimshilik jaýapkershilikten qurylyp ketý úshin tanysy Jannat Ahetovaǵa telefon shalyp, kómek suraǵan. J.Ahetova oqıǵa ornyna 15-20 mınýt ishinde jetip, áriptesi, jol-patrýldik polıtsııa qyzmetkeri M.Ibadýllaevtan ákimshilik hattamany alady. Keıin baspahanaǵa baryp, jańasyn jasatyp alyp, eskini ózinde saqtaǵan.
«Ábdramanova telefon shalyp, aıyppul tóleı almaıtynyn aıtyp, jylady. Kómektesýdi uıǵardym. Taǵylǵan aıypty tolyq moıyndaımyn. Men 14 jyl boıy quqyq qorǵaý salasynda eńbek etip júrmin. Mundaı jaǵdaı birinshi ret tirkeldi. Men bárine óte muqııat qaraıtyn edim»,- dedi Jannat Ahetova. «Zena» laqap atymen tanymal Jannat Ahetova aqtóbelik kólik júrgizýshilerge jaqsy tanys. Ol jol erejesin buzǵan júrgizýshilerdi zań aıasynda jazalap, aıyppul salatyn.
Sottaǵy aldyn-ala tyńdaý kezinde jol-patrýldik polıtsııa qyzmetkeri M.Ibadýllaev óz kinásin tolyq moıyndap, ókindi.
«Meniń bul isim durys emes, ózge áriptesterim qateligimdi qaıtalamasa eken. Kánimdi tolyq moıyndaımyn»,- dedi M.Ibadýllaev. Ol da Qylmystyq kodekstiń «Laýazymdyq ókilettilikterdi teris paıdalaný», «Jalǵan qujattardy, mórtabandardy, mórlerdi, blankilerdi, memlekettik poshta tólemi belgilerin, memlekettik nagradalardy qoldan jasaý, daıyndaý nemese ótkizý» baptary boıynsha sot alynda jaýap beredi.
Aıyptalýshylar isti qysqartylǵan tártippen ótkizýdi surady. Ekeýiniń kinási tolyq dáleldense, polıtsııa qyzmetkerleriniń múlki tárkilenip, ómir boıy quqyq qorǵaý salasynda jumys isteı almaıdy. Tipti, 4 jylǵa deıin bas bostandyǵynan shekteý jazasy taǵaıyndalýy múmkin.
