Aqtóbede Polshadan kontrabandylyq jolmen 18 asyl tuqymdy jylqy alyp kelgen 53 jasar azamat ustaldy
ASTANA. Qarashanyń 16-sy. QazAqparat /Aıdar Ospanalıev/ - Aqtóbeniń 53 jasar turǵyny kontrabandylyq jolmen Polshadan 18 asyl tuqymdy sáıgúlik alyp kelgen.
Jylqylardyń árqaısysyn qazaqstandyq 400-500 AQSh dollaryna satyp alǵan. Bul týraly búgin jýrnalıstermen bolǵan aptalyq brıfıngte Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov málim etti, dep habarlaıdy QazAqparat.
Onyń aıtýynsha, qazirgi tańda bul is boıynsha Iterpoldyń ortalyq bıýrosy men Ulttyq qaýipsizdik komıteti, qarjy polıtsııasy jáne keden organy qyzmetkerlerinen quralǵan arnaıy komısssııa qurý máselesi talqylanýda. Sondaı-aq atalmysh áreket boıynsha qylmystyq is qozǵaý máselesi de sheshilýde.
Brıfıng barysynda Q.Jumanov elde jasalǵan uıymdasqan qylmystyq áreketterge qatysty taǵy birqatar málimetterdi keltirdi.
Olar boıynsha Almatyda Jarkent aýdanynyń turǵyny ustalyp, odan 6 oǵy bar «Mark» jáne «PM» tapanshalary tárkilengen. Al Qaraǵandy oblysynyń Temirtaý qalasynda «Arselor Mıttal Temirtaý» aktsıonerlik qoǵamyna kire beriste eki júk kóligi men avtokran ustalǵan. Onda arnaıy qujattary joq 12 orama metall bolǵan. Sondaı-aq Jambyl oblysynyń tártip saqshylary oblys aımaǵynda júk kólikterine qaraqshylyq shabýyl uıymdastyryp júrgen qaraqshylardy Qapshaǵaı qalasynan ustaǵan. «Olar osy iske kúdikti degen 5 azamatty ustap, olardan gazdy tapansha men jol polıtsııasy qyzmetkeriniń taıaqshasyn tapqan. Qazirgi tańda atalmysh is boıynsha tekserý jumystary júrgizilýde», dedi departament bastyǵy.
